E proyektonan ku ta forma parti di Programa pa Desaroyo di Rif ta kontinuá. Entre nan diferente proyekto públiko ku ta den ehekushon. Esakinan ta Parkenan di Palu di Mangel 1 i Palu di Mangel 2, e dos kamindanan (nort – sùit i ost – west), i e último proyekto ku a kuminsá, esta e proyekto pa drecha e sistema di riolering den e área.
Riba djarason 26 di mei último un grupo grandi di dignatarionan, tantu Minister komo Parlamentarionan, a hasi un bishita den e área pa por tuma nota di e desaroyonan.
Den Parke di Palu di Mangel 1, esta entre Courtyard Marriot i Corendon, por mira konstrukshon di un ‘boardwalk’. Den futuro serkano, nos por kana den naturalesa i disfrutá di e palunan di mangel den e área aki. Tambe despues ku a habri e konekshon ku laman, por mira kon e awa a klara i ta purifikando su mes di forma natural.
Lo traha un toren estilo mirador pa tur hende por wak for di ariba den henter e parke. Tambe lo por kayak den e parke di mangel aki.
Banda di esaki, ta bai kuminsá ku e proyekto pa drecha henter e sistema di tuberia pa transportá awa sushi den e área. E tuberia ta konektá ku e planta di purifikashon di awa na Klein Hofje. Meta di e proyekto aki ta pa evitá ku kualke tipo di awa sushi òf desague den futuro lo por basha den e parkenan di palu di mangel.
Di e forma aki, Rif ta sigui desaroyá. E programa aki ta konsistí di proyektonan públiko i proyektonan priva. Por mira tambe kon e konstrukshon di Courtyard by Marriot ta lanta den gran forma. Corendon tambe ta sigui yama bishitante nan bon bini tantu komo turista riba nos mes isla, komo turista di afó. Pues apesar di e tempu difísil ku nos pais ta konfrontando, nos por mira proyektonan avansá ku ta krea perspektiva pa nos pueblo i kontribuí ku kresementu ekonómiko den un balanse duradero ku naturalesa.
