A sostene un entrevista recientemente cu Minister Ruisandro Cijntje cu ta encarga cu e cartera di Desaroyo Economico pa Gobierno di Corsou, tocante e desaroyo di energia sostenibel pa e isla.
E mandatario a mustra cu e desaroyo ta bayendo den bon direccion. E plan lo ta pa molinanan di biento lo tin e capacidad di genera hydrogen sostenibel (green hydrogen). A haci un “bodem-onderzoek” pa medio di e barco Fugro durante luna di Juli 2023.
Cijntje ta mustra cu e resultado den e rapport ta mustra hopi positivo y ta bayendo di e direccion conforme e plan (tijdlijn) pa por yega na aña 2026 cu lo tin e prome molinanan di “demo”. E mandatario a mustra cu tin cu compronde cu ta trata di inversionnan cuantioso hunto cu Hulanda.
Ta algo cu mundo ta bayendo di direccion di produccion di “waterstof” y tur loke tin di haber cu cambio climatico (climate change). E meta ta pa elimina e sistema actual di fossiel cu ta basa den su mayoria riba azeta, gas, carbon, petroleo, y pasa over pa energia berde (green energy) cu ta bin for di fuentenan natural manera awa, solo y biento.
E mandatario a mustra cu “waterstof hydrogen” ta converti e producto aki den amonia cu na su turno por produci coriente cu ne. Esey ta e caminda di e desaroyo mundial. Corsou lo ta un pais cu lo participa na e proyecto piloto (proyecto di prueba). E departamentonan ta traha fuerte y riba schedule pa asina por yega na e prome unidadnan “demo” na aña 2026 y despues pa sigui expande.
Hulanda ta un partner strategico cu Corsou den e proyecto aki, durante Mei 2023 Minister Cijntje a firma un Memorandum of Understanding (MOU) hunto cu Minister Hulandes Rob Jetten na Corsou. E politico a indica cu tin hopi compania Hulandes interesa, pero e proyecto ta habri pa tur compania cu ta desea di participa. A enfatisa cu Hulanda tin un rol activo di e proyecto aki hunto cu Gobierno di Corsou.
Den futuro e “governance” completo lo coopera cu otro y e structura completo lo tin cu bin. “Ta habri pa tur opcion”, segun e minister a finalisa bisando.
