Cu tres miembro di Parlamento di Aruba presente na Hulanda pa lobby cu miembronan di Eerste y Tweede Kamer di Parlamento di Hulanda, awe mainta Secretario di Estado Raymond Knops a manda pidi Parlamento pa wanta cu tratamento di e ley riba e geschillenregeling di otro siman. Un fecha nobo pa continua cu e reunion no tin ainda. Ta parce cu kier warda pa tin gobierno nobo na Corsou y Aruba prome cu continua cu e ley.
Recientenemente un delegacion di Aruba, cu ta consisti di parlamentarionan mr. Juan “Ady” Thijsen di MEP, mr. drs. Richard Arends di AVP y Ricardo Croes di RED a biaha pa Hulanda pa atende na e reunion di geschillenregeling.
Secretario di Asuntonan Interior y Relacionnan den Reino Hulandes, Raymond Knops, a manda un carta pa Eerste Kamer. El a informa cu e Parlamentonan di Aruba, Corsou y Sint Maarten no a bay di acuerdo cu e proposicion. Consecuentemente el a informa Eerste Kamer pa para e tratamento di Rijkswet Koninkrijksregeling, pa duna Conseho di Minister di Reino chens pa atende cu e tema aki internamente.
Cu esaki por conclui cu e punto aki no tin prioridad mas pa gobierno di Reino Hulandes, specialmente awor cu via COHO nan tin hopi mas di bisa den e islanan. E hecho cu Corsou, Sint Maarten y Aruba ta depende casi 100% riba sosten y financiamento di Hulanda, bou condicionnan impone door di Hulanda, ta haci henter e ley aki awo menos urgente. E islanan ta den un posicion cu mester cumpli toch cu Madre Patria, sino fono!
