Polis a detene Mama y Padrastro di mucha cu a fayece

Diaranson ultimo a yega Dr. Horacio E. Oduber Hospitaal un mucha di apenas 5 aña di edad cu lesionnan grave tur rond di su curpa. Su situacion a empeora den e oranan cu a sigui te cu el a bay den coma. E lesionnan a duna indicacion di tortura, pa cual a envolvi Polis mesora. Awe diabierna atardi e mucha Rishandroh Anastacia di 5 aña a fayece na Hospital. Su tras a sigui mesora detencion di su mama di inicial F. y su Padrastro di inicial M. Ambos ta encarcela y lo mester responde pa e sospechonan cu tin contra nan.

Famia di parti di su tata biologico a conta cu e mucha a yega Hospital cu weso di pols kibra, weso di schouder kibra, 2 ribchi; un di cada banda; kibra, bekkennan gescheur, kemadura di awa cayente, hersenbloeding di sla na cabes y riba dje a test positivo pa uzo di marihuana!

Segun version di famia di e tata, cu e mama lo a gaña autoridadnan cu e mucha a cay hungando den speeltuin. Algun di e fracturanan descubri no ta di casonan actual, sino di situacionnan bieu pero cu ainda no a cura di dje y nunca a hib’e Hospital pa ricibi tratamento medico. Famia a pidi pa Husticia pasobra imposibel cu un mama por tortura su mesun yiu di 5 aña di e forma aki, te cu ta mande den coma.

E mesun famia ta sigura cu tin mas ruman di e criatura aki cu ta scondi o sea cu nan tata tin simannan sin mira nan of no ta hayando acceso pa mira su yiunan. Riba esey Ministerio Publico a contesta cu no por bisa nada ainda. Locual si a confirma ta cu e mucha berdaderamente a fayece y cu su mama y “stiefvader” ta den man di husticia pa investigacion.

Husticia ta sospecha cu sea e mama, e Padrastro of ambos, lo por ta envolvi sea directamente of indirectamente cu morto di e criatura. Pesey mes Fiscal di Ministerio Publico a opta pa tuma e curpa den beslag pa Patologo por haci autopsia.