Partido MEP a tene reunion extraordinario un dia prome cu Parlamento di Aruba trata ley di matrimonio di mesun sexo. Esunnan presente a pidi prome minister pa purba para e tratamento di ley te ora cu e veredicto di casacion drenta. Tambe e mandatario a bisa cu gobierno no lo cay debi na diferencia di opinion.
Prome Minister, mr. Evelyn Wever-Croes, a indica nan ta organisa e reunionnan di Ban Topa y no ta solamente durante campaña mester ta den contacto cu pueblo, sino tin di haci esey constantemente. E ta haya cu esey ta un bon manera cu tur candidato ta comparti informacion. Tur candidato di diferente districto ta haci presentacion y esunnan presente ta haci pregunta riba cualkier topico.
Incluso tin hende kier trece algo personal dilanti y ta atende cu eseynan. E mandatario a expresa cu hopi persona a presenta y e ta considera cu tur cos a bay bon.
Scucha preocupacion
Un tema cu a bin hopi dilanti ta e ley di matrimonio di mesun sexo. E mandatario a expresa cu un reunion asina aki no ta pa pidi of haya mandato. Nan a ricibi varios pregunta riba e tema. Un di e oradornan n’e encuentro aki tabata mr. Edgard Vrolijk y el a haya un pregunta, despues prome minister tambe a haya pregunta.
Segun Wever-Croes, el a splica unda nan ta para. Aki el a splica cu e caso ta den casacion y unabes Hoge Raad duna veredicto, esey lo ta veredicto final. Por tin cuanto ley cu bo kier, pero si veredicto bisa cua banda mester bay e ora mester haci esey. No por pone un banda sin mas, aunke cu por purba, pero mester paga daño perhuicio.
Tur esey ta loke el a splica y di otro banda el a tende tur preocupacion treci dilanti, cual ta algo cu ta biba den comunidad. E tema aki ta uno delicado, tin diferente opinion. E mandatario a indica cu e tema aki ta tene henter comunidad dividi. MEP ta partido di pueblo y tin diferente opinion. E mandatario ta kere den tratamento di otro cu respet, duna tur hende respet den e discusion aki. E ta di pensamento cu asina ey lo sali afo.
Fraccion MEP lo sostene ley?
E tema aki ta trece e preocupacion cu ta biba den comunidad. Si esaki lo refleha durante e reunion na parlamento den e parti di voto pa sea aproba e ley of no, e mandatario a bay riba un ehempel di un persona cu tabata presente den e reunion extraordinario. E persona a acerca prome minister y a pidie pa haci tur lo posibel p’e ley no pasa, pa motibo cu e ta pensa cu esey lo afecta matrimonio y bida di famia na Aruba.
Otro a bisa cu e ley ta importante pa un segmento den comunidad, minoria chikito, cual no ta bay tanto p’e parti di casamento sino e reconocemento cu tur hende tin derecho di ta feliz, derecho cu tur hende tin di scoge ken nan ta stima den nan bida. Ey por mira cu tin e division den comunidad, unda un grupo ta contra y e otro ta na fabor. Tambe den partido tin esey. Prome minister a enfatisa cu e ta scucha tur hende y purba di splica unda nan ta para como e posibilidadnan. Den e caso aki door di casacion e situacion ta den man di Hoge Raad.
Coalicion no lo kibra
Di mira e division cu e tema aki trece cu ne, a puntra e mandatario si esaki por causa division di coalicion. Aki el a indica cu tempo a forma gobierno, e palabracionnan haci ta cu e tema aki no ta algo cu mester kibra e coalicion. E tema aki ta uno cu cada parlamentario ta para pa loke e ta kere y pensa. E no ta un cos cu por impone un linea di partido. Cada parlamentario ta defende su punto di bista y e no mester refleha nada den forma di traha den coalicion. Segun e mandatario, esey ta algo cu recientemente a reconfirma entre MEP y RAIZ.
