Un noticia cu a hala atencion diaranson mainta tabata e anuncio haci door di Gobierno di Boneiro riba nombramento di un Rubiano como Griffier di gobierno. Mas y mas profesionalnan local ta tumando rumbo pa exterior, principalmente Boneiro, unda cu tin miho pago y debi na e echo cu traha cu Gobierno di Aruba a bira un dolor di cabes.
Ta trata aki di Jacqueline Harewood, kende tabata traha na DIMAS y tabatin diferente caso den corte contra su minister, Glenbert Croes. E tabata encarga cu e seccion di asilo.
Awo a drenta e informacion cu Conseho Insular di Boneiro a aproba nombramento di Harewood como Griffier nobo.
Den e anuncio nan ta menciona cu despues di un trayecto exitoso pa yena e posicion di griffier insular, e Comision Fiho di Asuntonan di Trabou a propone Jacqueline Harewood como Griffier insular nobo di Boneiro entrante prome di september, 2024. Esaki a keda sostene durante reunion di Conseho Insular di 7 di mei 2024.
E Comision di Asuntonan di Trabou a conseha y a ricibi sosten pa acorda prolongacion temporal di e Griffier interino actual te cu 31 di december 2024. Esaki, considerando e necesidad pa transferi trabou y tambe pa duna sosten na diferente proyecto.
A nombra Mathilde Koetsier como Griffier suplente for di 7 di mei te cu 1 di october 2024, pa asina reforsa e team di griffier.
Ademas di Harewood, tin basta docente cu a dicidi pa bandona Aruba en busca di miho condicionnan laboral y ta parce cu na e momentonan aki Boneiro ta un di e opcionnan mas faborabel.
