Diamars anochi, den careda di 10:30 pm, a sosode un accidente n’e rotonde di Cumana. E accidente tabata entre un auto marca Honda color blauw numera A-49287 y un auto marca Toyota modelo Altezza color preto numera A-33353. E auto envolvi den e accidente ta di Minister Glenbert Croes.
E accidente aki a sosode un rato despues cu e minister a sali for di reunion “Ban Topa” di partido MEP na nan cede na Papilon. Prome Minister Evelyn Wever-Croes tambe tabata n’e sitio, unda por a mir’e ta papia cu e mandatario envolvi den e accidente.
Polis di trafico a presenta n’e sitio pa tuma dato di ambos chauffeur envolvi y pa investiga con e accidente a sosode. Tambe a pidi asistencia di ambulance p’un persona herida.
Na momento cu e ambulance a presenta n’e sitio, di biaha e paramediconan a brinda cuido medico necesario na e victima.