Diadomingo anochi, den careda di 8:00 pm, un homber a termina na boei pa loke el a haci. Pegamento di mondi na candela den Druivenstraat tabata suficiente motibo pa polis bay cu ne.
E homber a dicidi di pega un tereno bashi yena di yerba na candela. Net e momento ey e habitantenan a mir’e y di biaha a notifica polis. Na yegada di polis, e habitantenan mes a informa polis unda e homber a bay sconde den un bandona.
E polisnan a bay n’e cas y a bin topa cu e homber scondi. Di biaha a pon’e na boei. Segun informacion ricibi, e ta un persona cu ta frecuenta den e area di Druivenstraat. E bisiñanan a indica cu na varios ocasion a mir’e ta horta den e bario di Dakota. E bisiñanan a indica na polis cu no ta prome bes e ta haci tipo di acto straño den e bario.
No ta conoci pakico e homber, kende ta mustra basta hoben, a dicidi di cende e yerbanan na candela. Den transporte policial a hib’e pa warda di polis, unda a present’e dilanti subfiscal pa atend’e cu ne riba su acto.