Diadomingo na Theaterstraat, San Nicolas, e situacion cu cantidad di awa ta bin halto a continua. Pero e biaha aki cantidad di condom a bin halto. Diasabra caba Henderson Brugin a denuncia e problema aki, unda cu sushi ta keda para dilanti su cas.
E situacion ta uno alarmante, mirando cu e awa sushi aki un biaha mas ta sali fo’i e riool cu tin dilanti di Biblioteca Nacional na San Nicolas. Ningun departamento concerni ta haciendo algo pa stop e problema aki. E habitantenan cu ta biba den cercania di e biblioteca ta sinta pafo, pero mester soporta e holo desagradabel.
E habitante a expresa cu e situacion ta malo y no ta bon. Nan ta sufri di e holo aki desde diabierna anochi. Te ainda ningun hende a presenta n’e sitio pa asina haci algo. E ta lamenta cu no ta haci nada, pasobra Theaterstraat ta area di turista ya cu tur dia por mira nan eybanda. E habitante ta warda pa dialuna, ya cu gobierno ta traha mañan.
Desde momento cu awa a bin halto, por mira cu no solamente papel y plastic ta sali pero tambe condom. Esaki ta un situacion hopi fastioso, unda cu e departamentonan concerni no a presenta. Esunnan cu ta traha den e departamentonan concerni no lo gusta cu dia di mañan e situacion aki pasa dilanti nan cas, unda awa di riool ta bin halto y tin mal holo.
E awa ta bayendo direccion pa e otro riool. Cualkier vehiculo di motor cu pasa den Theaterstraat ta spart e awa riba acera. E habitante ta pidi pa e departamentonan concerni soluciona e problema aki mas lihe posibel, mirando cu nan mester mantene nan cas cera pa asina no haya holo.
