For di dia 13 te cu 19 di mei proximo, Instituto Kateketiko Diosesano Aruba lo ta organisando un Siman Catolico, cual lo tuma luga na Colegio Bon Bini.
Pader Jose Nava, di parokia di Madiki y su team di IKDA a cuminsa na bisa cu luna di mei ta un luna special pa iglesia Catolico. Motibo di esaki ta cu como iglesia, ta celebra Fiesta di Pentecoste, un fiesta c’un significacion profundo.
Durante un conferencia di prensa, Pader Jose a indica cu Iglesia Catolico di Aruba kier haci un yamada na e pueblo pa cuminsa celebra un Siman Catolico. Un siman cu lo yuda nos descubri pakico nos ta sinti nos orguyoso di ta catolico. Religion catolico ta hopi importante p’e pueblo catolico. No solamente na nivel spiritual, sino tambe na nivel humano. “Esey ta un detaye hopi importante di nos fe catolico,” Pader Jose a bisa.
E siman aki nos ta busca obhetivo. Y nos obhetivonan ta, specificamente, conoce y profundisa nos mes mas den nos fe. Pero tambe mustra nos fe cu orguyo. P’esey, e pastoornan di cada parokia lo tin diferente actividad den forma di nobena na honor di Spirito Santo. Pero na mesun tempo, conoce y profundisa den e fe catolico, e fe cristian.
Como ehempel, el a mustra cu pastoor Jairo di Santa Cruz, durante e nobena, e scolnan ta invita, hunto cu e scol-, mayor- y comunidad.
“Fe no ta pa nos, nos ta gusta comparti cu otro. Pero tin un elemento chikito cu nos kier mustra nos fe, meymey di nos pueblo, meymey di nos comunidad cu hopi orguyo y devocion.”
Adeline Trimon-Geerman, cu ta forma parti tambe di IKDA, a amplia mas riba e punto di nobena. Pa e ocasion special aki, a traha un cinta blanco, cu ta significa e bida nobo den Hesus. Meymey tin un cruz cu ta demostra e amor y entrega di Dios pa nos. Hunto cu e corsage tin tambe un QR Code, cu por scan y e tin un oracion cu por uza tur dia.
Costo di e corsage lo ta di 1 florin y loke genera ta pa cubri e mesun materialnan cu ta uza pa traha e corsagenan aki. Por haya esakinan n’e parokianan y tambe na algun scol.
E fiesta di Pentecoste ta e ultimo fiesta cu cual t a cera e tempo di Pasco di Resureccion. E tempo aki ta un tempo cu ta hala atencion riba elemento di bida. Un Dios cu ta bida, cu a biba, cu a resucita y ta biba cu nos.
Particularmente, den contexto di Siman Catolico, den contexto di e luna aki, unda cu ta celebra Pentecoste, lo tin un concurso di Rosario, traha di material recicla. Tin un elemento importante, e luna di meu, ta e luna di nos mama, Maria, luna di nos mama den sociedad, ta un tempo importante pa nos, pa yuda nos desaroya e devocion di nos mama Maria, pero na mes tempo, pa crea un cultura di reciclahe.
Na ultimo, pader Jose a bisa cu e tempo aki, ta un tempo pa crea un hobby importante, cu nos ta genera di nobo, ya cu e ta cuminsa crea un cultura di reciclahe pa nos cuida medio ambiente, pa nos cuida e planeta, pa nos cuida e hogar, cu ta nos hogar. Nos cada un di nos ta responsabel pa cuida y proteha nos hogar.
