Diaranson mainta ta poni riba schedule di parlamento tratamento di e proyecto di ley pa matrimonio di mesun sexo. E proyecto di ley aki tabata iniciativa di Miguel Mansur (Accion21); Marisol Tromp (MAS); Aquannette Gunn (MAS) y Misha Raymond (Raiz).
A entrega e concepto di ley aki cu mester a pasa diferente departamento prome cu parlamento a hay’e cla pa su tratamento. E entrega a tuma luga dia 16 di december di aña 2022.
Ta papia aki di mas cu trinta cambio den diferente articulo di Codigo Civil di Aruba; Landsverordening voorzieningen gewezen politieke ambtsdragers en hun nabestaanden; kiesverordening; Landsverordening leeftijdgrens ambtenaren; Ley di pensioen di behes di ambtenaarnan; Ley di Inkomstenbelasting; ley di admision y expulsion; Landsverordening maatschappelijke zorg; landsverordening kosteloze rechtskundige bijstand; ; landsverordening ongevallenverzekering; Landsverordening algemene ouderdomsverzekering; Landsverordening ambtearenrechtspraak; Handelsregisterverordening.
E cambionan den e leynan ariba menciona ta drenta na vigor asina cu e ley di matrimonio di mesun sexo drenta na vigor. Y cinco Minister mester firma e ley na final.
Conseho Consultativo a analisa e concepto di ley cu ta basa riba 20 argumento cu e parlamentarionan a pone pa bini cu e iniciativa y un di nan ta e dos decisionnan di hof, den dos caso apart, cu ta menciona cu mester habri matrimonio di mesun sexo na Aruba y Corsou , pasobra door di prohibie ta bay contra articulonan den Constitucion.
Conseho Consultativo a bisa cu e argumentonan duna ta convincente pa carga e proposicion. Solamente nan ta haya si e proyecto di ley aki a carga aprobacion di mas partido, e lo a duna un miho indicacion riba e sosten di e proposicion. Riba esaki esnan cu a presenta e concepto a reacciona bisando, cu e echo cu no tin mas hende cu a firma e concepto, no ta nifica cu nan lo no apoy’e den parlamento. Tin miembro di parlamento cu ta prefera di warda reaccion di Conseho Consultativo, mientras cu otronan kier warda e chens pa haci pregunta prome cu expresa nan mes.
Un di e preguntanan cu Raad a haci ta si lo no tabata miho pa regla e casamento di pareha di mesun sexo prome y djey regla e otro partinan di ley cu mester cambia, manera Hulanda a haci. Esnan cu a tuma e iniciativa a splica cu mester elimina mas lihe posibel e trato desigual di parehanan di mesun sexo. P’esey a scoge pa un ley mas integral posibel.
Den e ultimo parti cu e parlamentarionan a reacciona riba rapport di Conseho Consultativo, nan a bisa: E tema aki tin di haber cu derecho humano. Esnan cu a bini cu e ley aki ta kere cu cualkier contradiccion cu derecho humano no por dura ni un dia mas cu lo no necesario. P’esey a scoge pa laga introduci e ley via di un decreto gubernamental, ya cu di e forma ey gobierno ta haya chens pa fiha e reglanan di ehecucion y adapta e sistema di ICT, pa despues pone mas lihe den funcion e ley.
Pero cu introduccion di e ley e ora no tarda mas cu seis luna despues di su publicacion.
