Pa 9:00 am mester a cuminsa e reunion den parlamento riba matrimonio di mesun sexo. Tin dos aspecto cu a hala atencion. E reunion no a cuminsa na e ora indica y tribuna tampoco tabata accesibel ainda pa 9:30 am.
Remarcabel tabata e fila largo cu tabatin pafo di personanan sperando di por drenta paden y presencia e reunion di pareha di mesun sexo.
Astrid Rincones tabata un di e persona cu a yega en espera di haya oportunidad pa drenta paden.
Su pensamento ta cu Aruba no ta prepara pa matrimonio di mesun sexo. “Nos ta rabia,” el a bisa. Aruba no ta prepara pa e cos aki. Partidonan ta lubida cu mayoria di nan activistanan ta catolico y catolico no ta acepta e tema aki. E ta spera cu e partidonan tuma bon nota di esaki pasobra campaña ta na caminda.
Un otro cara conoci na e sitio ta Izaira Mansur, kende ta recorda e lucha inicia ocho aña pasa tempo di e amienda cu a pasa den parlamento. “Nos t’ey pa sostene esunnan cu no tin bos of no kier sali,” el a bisa. El a enfatisa cu su presencia ta pa esunnan cu no tin niun derecho of esnan manera e cu ta casa na Boneiro pero no tin ningun derecho na Aruba.
Tabatin dos grupo principal cu ta Orguyo y e grupo di Iglesianan Cristian di Aruba. E lider presente di Iglesianan Cristian tabata Frank Daal di Good Samaritan Cristian Center, kende a bisa cu e dia di awe ta uno hopi importante y ta spera cu e voto den parlamento bay di un forma cristian.
De lo contrario lo mira un Aruba completamente diferente, y no pa bon. “Nos ta spera di mira eyden un vota cristian, pasobra Aruba ta lanta riba norma cristian. Hopi cos ta den wega.”
