Riba e echo cu introduccion di environmental levy (impuesto di medio ambiente) di RWZI a puntra Minister di Naturalesa riba su opinion como lider di partido. E mandatario ta prefera di warda riba loke hues ta bay indica dia 8 di mei pa schors e decision di no uza insinerado di Parkietenbos.
Minister di Naturalesa, Ursell Arends, a indica durante conferencia di prensa cu e ta para dilanti como gobernante y no lider di partido RAIZ. Diamars tabata e ultimo dia cu e miembronan di parlamento por a haci pregunta riba e proposicion di ley riba RWZI. Y di eynan gobierno tin di sigui desaroya riba esey.
E mandatario ta haya cu e forma con ta manehando RWZI n’e momentonan aki no por sigui asina mas. Esaki tin impacto riba economia, riba e pilar economico di turismo, pero sigur impacto riba e salud di hende y naturalesa. Segun Arends, tur hende den comunidad ta consciente cu e manera aki no por continua mas. El a indica cu e miho solucion cu a haya ta pa privatisa RWZI.
Tambe pa percura di tin e modelo, e formula cu e inversionnan corecto y necesario por tuma luga p’e problematica cu tin pa decada ta bira problema di pasado. E ta haya cu asina ey por sigui bay dilanti, unda ta atende cu tur RWZI cu ta cuadra cu standard internacional.
Un pregunta cu a bin dilanti ta riba e echo con hopi mas turistico por ta elastico pa carga mas impuesto, pa asina por financia por ehempel RWZI. Segun e mandatario, nan ta scucha di tur stakeholder prome cu por tuma un decision, cual ta cuadra cu e aspecto aki. Gobierno no kier outpriced Aruba. E mandatario ta haya cu esey ta e miho formula di cual e mes a trece e tema aki dilanti.
El a haci esey na momento cu e no tabata miembro di parlamento ni minister, pero como politico na 2018 el a vocifera rib’e tema aki. Desde e tempo ey e tabata consciente di e consecuencianan cu esaki tin p’e sector turistico.
A puntra e mandatario riba e echo cu gobierno no tabata kier pa hues sinta riba nan stoel p’e tema di matrimonio di mesun sexo, pero si a laga CFT sinta rib’e stoel pa e topico di RWZI. Aki e mandatario a indica cu “we can’t cry over spilled milk”, pasobra esey ta algo di pasado. Awo nan ta enfoca pa futuro, solucion concreto ta e ley cu tin n’e momentonan aki den sala di parlamento.
Diamars tabata ultimo dia cu e parlamentarionan por a haci pregunta. Di eynan ta cuminsa prepara cu e ley por ta atendi den e organo di mas halto cu ta Parlamento di Aruba. Unabes cu esaki ta aproba, e inversionnan necesario por tuma luga. E mandatario ta haya cu e no ta perde tempo pa wak bek atras y e prioridad ta un solucion concreto.
Warda decision di hues pa uza insinerado
Siman pasa tabatin e situacion cu na Zeewijk awa a bay over n’e RWZI, incluso den Theaterstraat riool a bay over. Riba con leu e fase di Parkietenbos ta, unda e mandatario a yega di menciona cu esaki lo tarda pa algun luna, el a expresa cu a surgi algun contratiempo. Prome cu nan a atende cu esakinan, gobierno ta premira cu dia 8 di mei hues lo duna su decision riba e peticion haci pa schors un decision di corte cu ta bisa di no por uza e insinerado.
Pa mas lesa TREMPAN.COM.
