E conocido ciudadano Atan Lee a manda e siguiente comunicado di prensa, faltando un poco mas di un luna pa eleccion. E ta bisa lo siguiente:
“Un siman crucial pa pueblo conoce cu futuro sirbidonan. Cu lo entrega nan mes cu alma, mente, curason y principalmente cu VOCACION. ESTA SIGUI E YAMADA DI NOS CREADOR.
kico esaki tin di haci cu Dios, hopi, debi dia cu nan tuma nan posicion nan ta hura o priminti den nomber di Dios, segun nos constitucion cu nan lo bay haci nan trabao, segun Su mandamentonan.
Ya tin basta profesionalnan a publica cu nan ta cla pa sirbi nos pueblo, cual a yena mi cu hopi sastifaccion, pasobra ta tempo pa stop di para un banda y critica y critica, pero cu miedo y cobardia pa pone nan mes na servicio di nos comunidad.
Tin di nan cu a hacie den un forma grandi yen di fanfaria, pagando hopi pa grabacion etc. Den un tempo na unda nos pais ta pasando den su peor momento di historia. Pober y cu hendenan hopi pober, tur e placa aki por a ser duna na instancianan cu ta traha cu e pobernan. Dios lo a keda mas contento. Tur e banderanan, sticker, borchi cu ya ta ariba mercado, apenas algun dia cu a ser anuncia cu lo bay tin un eleccion prome cu tempo, ta placa cu por a regala na pobernan. Pueblo tuma nan y benta nan afo despues cu un menosprecio grandi.
Mi admiracion na tur partidonan cu lo bay campaña sin articulonan pa cumpra nos pueblo. Ni se compra ni se vende.
Te awor e partidonan chikito entre parentesis cu a presenta nan candidatonan, partido RAIZ a demostra di tin un lista di profesional bon balansa y ta cla pa representa pueblo den Parlamento y como Gobernantenan. Ban wak con e lista di e otronan lo bay ta.
Den partidonan grandi ya tin pelea y discusion pa number ariba lista, tur tumando na consideracion mal ehempel di e grandinan cu te ainda pa decadanan ta dirigi e partidonan grandi tras di cortina, na unda abuso di poder a tuma lugar na prome lugar fabornan na famia y amigo. Cu tin den nan historia listanan di hendenan cu a comete fraude, corupcion y ladronicia. E nobonan kisas tambe lo ta desea di ricibi un tiki poder pa sigui cu esaki? Rumannan tras di cortina ta cierto hendenan ta sigui dirigi e partidonan aki. Nan ta goza di un pension miyonario y overbruggingstoelge miyonario y ainda nan kier mas.
E politico cu merece mi respet, kende pafo di Parlamento a hiba un tremendo oposicion ta drs. Booshi Wever. Un politico honesto y digno cu merece confiansa di pueblo. Cuanto denuncia e a haci cu poco poco ta conoce e luz di berdad. E a renuncia su pension miyonario pe sigui sirbi su pueblo.
Otro cu a pasa den tur partido cu al fin lo conoce su fin politico como lider. Si den 3 partido bo no por a funciona, anto algo ta fout cu bo señora. No papia di honestidad, debi cu bo a vota pa tur e proyectonan bou investigacion, cu bo lider di POR a bin cu nan y cu mester a haya aprobacion di parlamento. Incinerator cu a costa miyones ta para putri, placa di pueblo. Un Serlimar bancarota, contal a complace amigonan cu fabornan. Un radar cu no ta funciona, un pais yena cu ilegal, droga, atraco, asesinato y arma.
Ban spera cu nos lo conoce politiconan nobo cu si kier traha honestamente pa nos pueblo, sin presion di e bieunan. Hopi di e bieunan ta sigui ariba lista cu e unico proposito traha te ora nan por cobra nan pension. Anto ariba dje cu un posicion supuestamente eligible.”
