Mainta trempan corte a anuncia su decision tuma riba peticion haci door di gobierno pa uza e incinerator cu tin na Parkietenbos. Aña pasa corte a ordena cu no por uza incinerator cu no tin un permiso di molester adecua. E puntonan a base di cual a otorga e permiso di molester no a cumpli cu tur rekisito di ley.
Despues cu a logra drecha e incinerator, cu tabatin algun piesa daña, no por a uz’e ainda (mas cu shete luna), debi na e decision di corte.
Mirando e acumulacion di slib (sludge) di tanto e incinerator como cu loke ta produci na e planta di purificacion di awa na Bubali, minister encarga a bay corte pa pidi permiso special, edsta pa pospone e ordo di corte, cu cual lo permiti uza e incinerator toch pa kima e cantidad di slib cu tin acumula.
Ultimo por a compronde cu tabatin mas cu 8 container di slib, y e ta creando un situacion desagradabel. Corte a dicidi awe cu ta bay di acuerdo cu e peticion aki. Keda pendiente pa detayenan di e decision aki cu lo bini mas laat den un otro articulo.
