For di oranan di mainta tempran ta tumando luga eleccion pa e directiva nobo di The New China Club, cu for di algun tempo tabatin diferente bay bin pa loke ta e directiva.
Sinembargo a yega e dia pa e comunidad Chines cu ta miembro di club, por eligi un directiva nobo.
E club ta siguiendo tur protocol pa asina controla e miembronan prome cu nan drenta e edificio pa nan bay vota.
Representante di e club, Juanna Wu a conta cu esaki ta e di seis eleccion pa directiva di e New China Club, caminda cu e miembronan mayor di 18 aña por vota pa e miembronan nobo.
Ta trata aki di entre 900 pa 1000 miembro cu ta participando den e eleccion aki. E proceso aki a cuminsa for di 9’or di mainta y lo caba pa 8’or di anochi.
Por a tuma nota cu nan tabatin diferente mesa siguiendo asina e proceso necesario di acuerdo cu DVG. Nan a haya e permiso pa por efectua e eleccion. Ta gradicido cu e departamentonan concerni cu a coopera cu e club pa haci tur esaki posibel.
Wu ta conta cu prome cos cu e miembronan ta haci, ta registra, firma y despues nan ta haya un stembiljet pa nan bay vota.
Despues nan ta bay patras unda cu tin un urna transparente caminda e miembronan ta deposita nan voto. E miembronan ta sinta na mesanan bashi, nan ta vota y hinca e papel den e tombola.
Henter e proceso aki tabatin varios luna ta preparando pa e eleccion aki. Mester mantene tambe na regla segun e medidanan stipula pa ley.
Ta haci un invitacion na e demas miembronan di e comunidad Chines pa bin na e club pa deposita nan voto.
