Den Mateo 11:28-29 Hesus ta bisa: Bin cerca Mi tur cu ta cansa y carga y lo mi duna boso sosiego. Tuma Mi yugo riba boso,y siña di Mi pasobra Mi ta manso y humilde di curason, y boso lo haya sosiego pa boso alma.
Tin hopi carga cu hende ta carga riba nan curason, cu nan no por deal cu ne, p’esey Hesus den su misericordia ta bisa pa nos yega cerca dje, pasobra E tin e capacidad di tuma e carga over, y duna pas y siguridad.
Ta para skirbi den 1Huan 1:9 : Si nos confesa nos picanan, E ta fiel y husto pa pordona nos, nos picanan y limpia nos di tur inhusticia.
Pa yega na pordon, mester tin confesion, pasobra mientras cu nos no confesa tur cos, e pica ta keda molestia nos consenshi.
Consecuencia di esaki ta, hopi hende ta comete un delito y bay cera den prizon y e ta sali y bolbe comete mes un eror, pasobra e persona aki no a confesa su pica, pa asina e por aparta y wordo libera for di dje.
Dios ta para cu dos brasa habri pa pordona tur esunnan cu arepenti y confesa nan pica, y asina acepta Cristo Hesus den nan bida y cuminsa un bida nobo.
Dios no a manda su Yiu na mundo pa condena hende, sino pa salba hende, awor ora nos ta pretende cu nos ta bon, ora nos ta wak otro hende y no ta wak nos mes, esey ta nifica cu nos ta leu for di e caminda cu nos mester ta.
E enemigo di nos alma , cual ta e diabel kier pa nos keda biba den pica, drenta mas profundo posibel den e mundo di scuridad y no reconoce e plan di salbacion ( Juan 3:16) cu Dios a ofrece na henter mundo.
Tin hopi hende ta biba den pica ,pasobra nan ta pensa cu nan, divorcio, nan aborto, nan embaraso hubenil,nan adulterio, etc, etc keto bay ta riba nan consenshi y Dios no ta pordona, pasobra asina hende a bisa nan, pero e palabra di Dios ta bisa diferente:
*Salmo 103:3: Ta para skirbi: Kende ta pordona tur bo inikidadnan, kende ta cura tur bo dolencia nan.
*Salmo 86:5: Pasobra Abo, Señor ta bon, y cla pa pordona, y abundante den misericordia, pa tur esunnan cu ta sclama na bo.
*Salmo 103: 8 Señor ta yen di compasion y gracia, Kende no ta rabia lihe,y ta abunda den misericordia.
*Salmo 103:9 E lo no reprende pa semper, ni keda rabia pa semper.
*Daniel 9:9: Cerca Señor nos Dios tin compasion y pordon, maske nos a rebeldia contra dje.
Pa cana den luz, pa nos tin bida eterna, pa nos ta un persona nobo, pa nos por wordo identifica como siervo di Dios nos ta wordo pordona ora nos reconoce Cristo Hesus como Señor y Salbador.
No laga ningun hende bisa bo cu Dios no ta pordona bo, pero acerca Señor cu tur humildad y e lo tin misericordia y compasion di bo.
E enemigo semper lo keda acusa bo di bo pasado, pero e pordon di Dios, ta libra bo di pica, y tambe ta aparta pica for di bo bida, pasobra ora bo entrega bo bida completamente na Cristo pica ya no tin dominio mas riba bo bida.(Romanonan 6:14).
Hopi hende ta cana cu problema di salud mental bao di engaño di diabel, y nan mester di nan liberacion , cu solamente nan por haya den nomber di Cristo Hesus, pasobra solamente Dios por pordona pica.
Skirbi pa Pastor Marcel Balootje
