Ta basta cu defende maldad, orguyo, inmoralidad y perversidad, ta basta coopera cu hende pa wanta nan den scuridad, ta basta coopera cu diabel pa asina hende por rechasa y no reconoce Dios.
Esaki ta no ta un wega , ni tampoco fanatismo, pero e gran berdad cu Cristo Hesus a bisa; Mi ta bisa bo cu abo ta Pedro, y riba e baranca aki lo Mi traha Mi iglesia, y e portanan di fierno lo no triunfa riba dje. ( Mateo 16:18).
Lo Mi duna bo e yabinan di e reino di cielo: y tur loke bo mara riba tera, lo ta mara den cielo, y tur loke bo los riba tera ta wordo di los den cielo.( Mateo 16:19).
Ma ni un hende no por drenta cas di e homber fuerte y plunder su propiedad, si e no mara e homber fuerte prome. ( Marco 3:27).
Pasobra nos lucha no ta contra carni y sanger,sino contra gobernantenan,contra e podernan,contra e forsanan mundial di e scuridad aki, contra e forsanan spiritual di maldad, den luganan celestial.( Efesionan 6:12-13)
Esun cu ta practica pica ta di diabel, pasobra diabel a haci pica for di principio. E Yiu di Dios a aparece pa e proposito aki ,pa destrui e obranan di diabel. (1 Juan 3:8).
Pasobra maske nos ta cana den carni,nos no ta bataya segun carni. Pasobra e armanan cu nos ta bataya cu ne no ta carnal, ma poderoso den Dios, pa basha fortinan abao.
Y pa destrui speculacion y tur arogancia, cu ta wordo lanta contra e conocemento di Dios, hibando den cautiverio tur pensamento, pa haci nan obedecido na Cristo y nos ta cla pa castiga tur desobediencia, unabes cu boso obediencia ta completo.( 2 Corintionan 10:4).
Ta hopi maldad ta rondona nos tur dia, ta hopi spirito di inmoralidad ta rondiando riba nos isla, p’esey nos mester haci oracion constantemente, pa nos bida, nos cas y nos famia, y specialmente pa nos hubentud, pasobra e enemigo ta jaag tras di nos hubentud sembra tur sorto di violencia y bagamunderia.
Cada cas riba nos isla mester wordo transforma su mes den un fortalesa di oracion, haciendo oracion constantemente, yamando riba Dios su nomber pa asina nos por wordo libra di e ola di inmoralidad cu kier domina y kita pas y invadi cas di famia.
Nos tin di haci oracion pa nos mandatarionan, pa nan no cay den trampa di enemigo, pa Dios mantene nan mente liber di tur cos impuro, y nan corda cu nan ta e modelonan di e pias aki.Si nan traha cu sabiduria e pueblo por descansa trankil anochi.
Ta hopi engaño di diabel tin riba caya, pero Dios a priminti nos cu E lo ta cu nos, pasobra ta parce manera bida di hende no tin balor mas. Hende ta transforma nan mes den cualkier cos, pa asina nan por complace cu e deseonan di e mundo.
Pesey nos no ta depende riba hende, pero nos ta depende riba Dios Todopoderoso, pasobra den dje nos confiansa ta awe y pa semper.
E enemigo ta conoci pa nos tur, pero tambe nos oracion mester ta constante, pa tumba fortinan di maldad abao, nos bida mester ta di acuerdo cu Dios su palabra pa nos por enfrenta y reprende e enemigo.
Señor ta nos luz y nos salbacion, Señor ta e fortaleza di nos bida, e ta e baranca fuerte den ken nos ta confia p’esey nos tin di para fuerte den oracion, pasobra e ladron a bini solamente pa horta mata y destrui. ( Juan 10:10).
