Ora e palabra di Dios ta bisa nos den Romanonan 12;2 : No sea conforme e mundo aki,ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.
Pasobra e sabiduria di e mundo aki ta bobedad dilanti di Dios.(1Corintionan 3:19).
No participa den e obranan , infructifero di scuridad,sino mas bien expone nan, pasobra ta un berguensa hasta papia di e cosnan cu nan ta haci na secreto. Pasobra e fruta di luz ta consisti di tur bondad y husticia,y berdad.(Efesionan 5:8-11).
Sinembargo , e fundeshi firme di Dios ta para, seya cu e inscripcion aki: Señor conoce esunnan cu ta di dje. Y laga tur esunnan cu ta menciona nomber di Señor abstene di maldad.(2 Timoteo 2:19)
E ta duro pa bisa, pero ta saliendo na cla, pasobra Señor ta purba Caracter, Firmesa y Fieldad di hende , y ta bay resulta cu tin hende ta baila cu tur cos, pa haya cos y pa nan keda bon cu hende y mundo, sin tene cuenta cu nan relacion cu Dios mester ta solido. ( Salmo 1).
Abraham tabata stima su relacion cu Dios, mas cu tur cos p’esey a yega un momento cu e mester a separa for di Lot.
Ta bay sali na cla cu hopi kier amistad cu hende cu ta sirbi Dios, pa spiona den nan bida, pa sa nan proposito, pa tene reunion cu nan pero e curason mes di e personanan ey no ta cu Dios.( Huesnan 16:18-20.).
Pasobra Hesus mes a bisa cu no ta tur hende cu bisa Mi,Señor Señor lo drenta e reino di cielo: Ma esun cu haci e boluntad di mi Tata cu ta den cielo.(Mateo 7:21-23).
Awor nos a mira cu den e tempo cu nos ta biba aki, e versiculo aki a bira un arma cu religiosonan pa usa contra otro, durante nan mensahe, pero locual Hesus kier bisa nos cla, ta para skirbi den Mateo:25:31-46).
Hopi ta purba mescla Dios cu hopi cos, hinca Dios den cierto programa, caminda e boluntad di Dios no ta aparece, hopi kier cana den scuridad, pero toch nan kier ta den e luz di Señor, y nan ta lubida cu e palabra di Dios ta bisa cu E a saca nos for di scuridad y trece nos na e luz, cual ta Cristo Hesus e luz di mundo.
Ta dificil pa un hende por tin comunion cu luz y scuridad na mes un momento, y esey Daniel a demostra den Daniel capitulo 6, siendo un profeta, pero no laga nos lubida e posicion halto cu e tabatin den reinado of gobierno di rey Dario.
Wak bon con norma y balor den cas di famia, den comunidad ta casi disparce, pa asina bagamunderia wordo adapta legalmente. Tin hopi hende sabi cu no kier reconoce Dios, y esaki ta pasando rond mundo y nos por mira cla con enemigo ta uza nan pa yoyo.
Pasobra e unico manera pa un hende scucha e palabra di Dios, y toch sigui den su mes un caminda, e persona ey ta demostra personalmente cu su bida , cu e no ta haya necesario pa reconoce Dios, cu tur e consecuencia cu ta para skirbi den Romanonan 1:28-32 y Galationan 5:19-21.
Laga nos haci hopi oracion, pasobra nos no por lubida cu ta para skirbi cu e mundo lo bira manera tempo di Noe, specialmente locual tin para skirbi den Genesis 6:5.
Ta tempo pa humilia , arepenti y busca cara di Dios constantemente.
Skirbi pa Pastoor Marcel Balootje.
