Den landamento Aruba tin dos medaya mas. Patrick Groters y Mikel Schreuders a percura p’e himno nacional di Aruba zona den Weganan Centroamericano y di Caribe na San Salvador.
Mikel Schreuders a landa diamars mainta den e categoria di 50 meter Butterfly. Despues cu el a logra clasifica, e mester a competi den e heat final. Enfocando pa yega final, el a haci un bon tempo y a termina na di dos luga, ganando medaya di oro. Asina aki e ta bolbe gana medaya den landamento.
Den ora di anochi tanto Mikel Schreuders como Patrick Groters a competi. Ambos landado a pone dilanti nan pa gana medaya. Groters a sa di duna un bon bataya, unda el a logra clasifica den su heat pa competi p’e final.
Aki el a enfoca riba medaya di oro, unda el a yega final mas lihe cu e tabata por. Asina aki el a logra e prome medaya di Weganan Centroamericano y di Caribe 2023. Cu e dos medayanan aki Aruba tin un total di diesun medaya te asina leu, dos di oro, cinco plata y cuater brons. Ainda tin mas deporte cu Aruba ta participando aden.
MAS MEDAYA PA LANDAMENTO ARTISTICO
Fuera di e logro grandi di diamars anochi, e ekipo di landamento artistico di Aruba un biaha mas a logra medaya di brons pa Aruba, cu un puntuacion di 156.4467.
Esaki a tuma luga durante e evento di Team Acrobatico na Compleho Deportivo El Polvorin.
Un palabra di pabien ta bay na nos atlenanan cu ta sacando cara di Aruba na San Salvador durante e Weganan Centroamericano y di Caribe 2023.