Recientemente Raad van Beroep di Ambtenarenzaken a yega na un decision den e caso di un guardia di KIA (unda ya caba tin problema cu escasez di personal) cu kier haya un chens pa sigui traha. A pesar di a haya e chens aki y toch a cay bek pa comete echonan cu a pone cu a dicidi di dun’e su retiro.
E sentencia cu el a apela tabata esun di 9 di mei 2022. Dia 15 di december 2021 e funcionario aki a haya retiro como castigo disciplinario. E tabatin un decision contra dje caba di retiro condicional, cu fecha 27 di october 2020 y despues di un otro acto, a comberti esey den un retiro definitivo. El a haci un obheccion contra su retiro, pero a declara esaki un obheccion sin base. Y despues el a dicidi di bay den apelacion.
E ciudadano aki ta den servicio di Dienst Gevangeniswezen Aruba desde aña 2004. Ultimo como gevangenisinrichtingswerker, yudando presonan diariamente door di brinda nan guia. Tanto na aña 2013 como na aña 2017 a impone medida disciplinario contra dje pa incumplimento pa cu su trabou (varios).
Na ana 2018 a traha un proces-verbaal den cuadro di un investigacion penal pa posesion y uzo di droga y comportacion violento. Debi na e incumplimento aki a impone contra dje dia 27 di october 2020, e castigo disciplinario di retiro condicional. A pone un tempo di prueba di dos aña, durante cual e no por haci su mes culpabel na algo similar y tampoco otro violacion di su reglanan di trabou.
Pero a resulta cu dia 14 di maart 2020, el a haya su mes envolvi den un accidente, cu el a ocasiona y inicialmente a sigui core despues di e accidente. E no tabatin rijbewijs. Den e auto a haya poco marihuana. El a maneha bou influencia di alcohol. A impone riba dje un boet di 3600 florin, di cual 600 tabata condicional, cu un tempo di prueba di dos aña combina cu algun condicion special.
Su doño di trabou a haya e incidente di 14 di maart 2020 un incumplimento formal pa su reglanan di trabou. Mas pasobra e ta un ambtenaar trahando den e cadena di husticia, unda ta pone hopi enfasis y importancia na normanan, integridad y profesionalismo. Debi cu no tabatin confiansa mas den su actuacion integro como un trahado di KIA, a dicidi di dun’e su retiro.
Corte a haya cu su apelacion no tin sentido pasobra ta di acuerdo cu el a haci su mes culpabel na un plichtsverzuim hopi serio. Y cu e castigo impone no ta inhusto mirando cu esey no tabata su prome castigo disciplinario.
E guardia di KIA a trata di saca su curpa dunando ehempel di caso di un otro ambtenaar cu tambe a gara ta maneha bou influencia y no a haya un castigo disciplinario. Pero Corte a bisa cu no a proba cu e casonan ta igual. Pues su retiro for di Gobierno ta keda valido y legal.
