Maldad ta locual mundo ta experiencia cada momento, caminda hende cada dia ta bira mas contra otro. E falta di respet cu ta reina , e orguyo, amargura y odio, e aceptacion di maldad y inmoralidad, ta nada mas cu un prueba con maldad, ta purba domina, pa na final destrui hende.
Tur hende ta na altura: E ladron ta bini solamente pa horta , pa mata, y pa destrui , Ami a bini pa nan tin bida, y pa nan tin e na abundancia (Juan 10:10).
Dios kier pa nos por separa maldad for di nos curason, pasobra Dios ta mira nos curason. Pasobra ta for di nos curason ta sali mal comportacion, palabra malo y tur locual ta contamina nos bida.
No stima e mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke tin den mundo, e deseo di e carni, y e deseo di e wowo, y e orguyo di bida, no ta bini di e Tata sino di e mundo. E mundo ta pasa bay y su deseonan tambe, ma esun cu haci e boluntad di Dios ta permanece pa semper (1 Juan 2:15).
Dios su boluntad pa nos bida ta lo siguiente:
Pa ora bo mira un hende sunu bo bistie y pa no bira lomba pa bo mes famia.
Si bo kita e yugo for di meymey di boso, si bo stop di mustra dede y di lanta calumnia, si bo pone bo mes disponibel pa yuda esunnan cu tin hamber, y satisface e deseo di esunnan afligi, e ora ey bo luz lo sali den scuridad, y bo tiniebla lo bira manera merdia (Isaias 58:7-10).
P’esey considera e miembronan di boso curpa terenal como morto pa inmoralidad, impuresa,pasion,deseo malo, y golosidad,cu ta igual na idolatria. Pasobra pa motibo di e cosnan aki, cu e furia di Dios lo bini riba e yiunan di desobediencia (Colosensenan 3:5-6).
Ma awor boso tambe mester pone tur esaki nan un banda:rabia, furia, maldad, calumnia y palabra sushi for di boso boca (Colosensenan 3:8).
No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento, pa esaki duna gracia na esunnan cu ta tende. Laga tur amargura, furia, rabia, griteria y calumnia ta kita for di boso, sea cariñoso un cu otro, misericordioso pordonando otro, mescos cu Dios den Cristo tambe a pordona boso (Efesionan 4:29-31).
Awendia tin un pensamento ta reina, cu ta contra coreccion y disciplina, hende ta kere cu nan por biba manera nan kier den tur clase di bagamunderia y inmoralidad.
Nan no ta respeta e palabra di Dios, bo no por coregi nan actuacion, nan ta busca tur clase di defensa y excuus barata pa continua den maldad, bayendo den cuna di scuridad, comosifuera ta un receta di maldad tin pa nan bida y nan mester cumpli cu ne (Romanonan 1:29-32).
Aki nan nos por comproba cu e muraya spiritual, y esun di amor, di decencia, di respet,y balornan di famia, ta tambalia, y tin hopi cas di famia, caminda e ta na suela, cu ta solamente palabra di Dios, arepentimento, y entrega di bida na Cristo Hesus, por trece hende bek riba e caminda di berdad y bida.
Solamente si nos tur uni den oracion,arepenti, busca Dios su cara, y stima otro di berdad, nos por bini bek na e caminda di Dios.
