Contrario na e declaracionnan di, entre otro, Minister Ursell Arends encarga cu maneho di desperdicio, Hof a pone condicionnan operacional estricto pa reactivacion di e incinerator na Parkietenbos. E decision aki ta uno temporal cu ta valido te ora cu Hof duna un sentencia definitivo den e caso di apelacion.
Condicionnan principal stipula door di Hof:
- Cumplimento di normanan estricto di emision: E insinerado mester cumpli cu normanan specifico di emision pa substancianan manera stof, monoxido di carbon y oxido di nitrogeno cu monitoreo continuo.
- Cumplimento di normanan estricto di capacidad: E incinerator tin un capacidad maximo di kima segun normanan di fabrica. Ta claro cu esaki frecuentemente tabata wordo surpasa. E normanan di capacidad aki no mag wordo surpasa mester limita e cantidad di desperdicio cu ta wordo poni aden.
- Reportahe periodico: Mester entrega periodicamente rapport cu e detayenan di emision na Hof y mester publica esakinan pa asina nan ta accesibel pa publico.
- Establece proceduranan operacional: Mester establece normanan operacional dentro di tres luna, specificamente pa local ta trata e siguridad di e operacion y eficiencia di e insinerado. Esakinan tambe mester wordo comparti cu Hof y riba peticion mester ta disponibel publicamente.
- Instruccionnan tecnico y di mantencion: Mester tin instruccionnan specifico pa e personal tocante con pa trata cu diferente tipo di desperdicio y mantencion di e instalacion pa preveni sobrecarga y fayonan tecnico. E instruccionnan aki tambe mester wordo comparti cu Hof y riba peticion mester ta disponibel publicamente.
Conclusion di e veredicto ta cu Pais Aruba (Departamento di Obra Publico ) mester percura pa cumpli cu tur rekisitonan di Hof y tambe esunnan estableci pa e fabricante y liga na e permiso. E medidanan aki ta resalta e preocupacion serio di Hof tocante e riesgonan potencial pa medio ambiente y salud relaciona cu e operacion di e insinerado y ta rekeri esfuersonan considerabel di Gobierno den corto plaso pa por cumpli cu tur e condicionnan estricto aki. Cumplimento ta encera supervision y control estricto y ta depende fuertemente riba capacidad administrativo, tecnico y financiero di e entidadnan envolvi, manera DOW, DNM y DVG.
Ta haci yamada na habitantenan di Parkietenbos, henter comunidad y representantenan di pueblo den parlamento pa ta vigilante y monitor e operacion di e insinerado. Ta crucial pa Gobierno cumpli cu e normanan estricto aki pa garantisa e siguridad y salud di tur residente di Aruba.
Manera Hof a stipula claramente den e sentencia: Cambionan den echonan of circunstancianan ta permiti pa acudi na cualkier momento na e hues di provision pa pidi pa e decision (suspension/provision temporal) wordo cambia.
