Durante tratamento di ley di matrimonio di mesun sexo e parlamentarionan a trece dilanti nan opinion. Den di dos tanda cual, a tarda pa inicia, e parlamentarionan a pidi punto di ordo.
Drs. Mervin Wyatt-Ras, parlamentario (AVP), a indica cu na momento un miembro di parlamento no ta vota, e tin di bandona e sala. Desde mainta tin discusion fuerte. El a expresa su mal contento mirando cu desde mainta ta discuti esey y e kier a trece e punto aki dilanti. El a elogia parlamentario Marisol Tromp cu a trece e punto ey dilanti.
Di otro banda e parlamentario independiente, mr. Gerlien Croes, a trece dilanti cu no ta prome bes proceso ta encamina contra forma constitucional y huridico den Parlamento. Prome cu pasa n’e parti di votacion, ta importante pa tur dicidi p’e miembronan aki bandona sala si tin e intencion di abstene pa vota.
Croes a indica cu mainta caba nan a trece punto dilanti, momento cu Santos do Nascimento a bay di acuerdo pa yama y awo ta inaceptabel locual ta pasando pa bay den un comision central. Awo den un ora di tempo su opinion a cambia. E realidad ta cu nan mester dicidi y loke a splica no ta corecto.
Parlamentario independiente, mr. dr. Ryçond Santos do Nascimento, a bay riba e reglanan constitucional esey ta significa cu diesun parlamentario mester vota voor p’e ley di matrimonio di mesun sexo pasa. Esey e ta, mientras cu e resto ta bruhamento. Esey ta e realidad y loke e kier a finalisa cu ne tabata p’e Presidente di Parlamento sabiduria pa tuma e decision corecto.
Hendrik Tevreden, parlamentario (MEP), kier sa desde ki tempo un parlamentario no tin derecho di scoge kico e ta haci, sea vota contra, vota voor of keda sin vota. El a indica cu tur parlamentario tin e derecho di dicidi si nan ta vota voor, contra of ta abstene.
Ta papia di tempo, pero esun cu no por tuma decision ta parlamentario Croes. E parlamentario di MEP a indica cu tres siman a dura Croes pa tuma un decision pa sali fo’i un partido politico.
Presidente di Parlamento, mr. Edgard Vrolijk, a indica cu nan no a sali di Senioren Convent cu un conclusion y e kier pa pueblo sa. El a indica cu tabatin un praktijk y tin cos a pasa, p’esey el a bay e Senioren Convent. E pregunta ta cu den e staatsregeling tin skirbi di cantidad di persona cu ta sinta eyden.
Den e reglement van ordering no ta defini tampoco si mester sali pafo. E ta un procedura di custumber y a yega di practica caba cu hende a sinta eyden na momento di votacion no a vota, inclui su persona tambe, nan a abstene di vota.
Vrolijk a indica cu eynan e pregunta huridico ta bini si esey ta conta of no ta conta, con e ta hinca den otro. Eynan ta unda cu nan tin e problema y no a caba di resolve esey. E ta haya cu esey ta un problema legitimo, y e no kier haci e mesun eror di esunnan anterior. E prome carta cu nan a manda tabata pa Gobernador.
E ta haya cu esaki ta un tema serio y mester trat’e serio. E no ta hunga politica cu esaki. A bin punto di ordo y esey ta algo orkestra, y e no ta bay den politica di orkestracion. E cos aki ta algo serio y nan ta dañ’e caba, y hacie otro contexto.
Raymond Kamperveen, parlamentario (RAIZ), a expresa cu ta importante pa democracia cu mester yama Comision Central pa busca e parti huridico lihe pa asina por tuma un decision awe ainda. No por laga esaki sigui manera e ta bayendo.
Vrolijk a dicidi di schors e reunion pa asina e cabesnan por fria y ta bin bek un otro ronda. Aunke e parlamentarionan di oposicion a protesta contra di e schorsing, Vrolijk ta haya cu esaki no tin nada di haber cu politica. E ta haya cu e cos aki ta serio, pasobra ni Parlamento no por sali over e votacion.
