Despues di ATA, awo ta AHATA, e asociacion di hoteleronan di Aruba, ta expresa nan preocupacion riba e opinionnan rond cu Aruba a bira demasiado caro. Ultimo añanan a bini cu diferente tipo di medida, principalmente fiscal, cu comercio sigur no ta carga y ta pas’e bek riba e consumidornan, incluso den e sector turismo, cu ta considera e galiña cu ta pone e webo di oro.
Tisa LaSorte, Chief Exceutive Officer (CEO) di AHATA, tambe a expresa su mes riba e tema aki. Aruba semper tabatin exito grandi den turismo. E prueba mas grandi ta con lihe a recupera despues di pandemia di COVID-19.
“E exito aki ta hacie facil pa e politiconan pensa cu esaki ta algo cu semper lo ta facil.” Pero ta hopi aña di trabou duro di miles di persona combina cu inversion y mercadeo, cu a crea e reputacion pa atrae e turistanan pa e isla. “Pero,” LaSorte a bisa, “esaki no ta nifica cu e reputacion ey no ta fragil.
Ta masha importante, segun e ehecutivo di AHATA, cu ora ta hisa gasto pa e turista wak si ta hisa e balor tambe di loke e turista ta ricibi a cambio.
Mester sigui inverti den e industria di turismo pa duna un producto di e miho calidad. E ta nifica bon servicio, solucion pa escasez di trahado y incentivo pa e propietarionan sigui inverti pa haci e producto mas bunita y di miho calidad. Esaki ta necesario despues cu den e ultimo cambio fiscal, a kita (elimina) mayoria di e incentivonan. “Si ta hisa e prijs pa turista, introduci algun incentivo pa e inversionistanan sigui hinca placa den e producto(nan) cu nos ta ofrece.”
