Desde mainta Parlamento di Aruba a cuminsa trata e ley di matrimonio di mesun sexo. Despues di 10:00 pm e resultado a drenta unda cu esaki a termina empata na 10-10 y un parlamentario, den e caso aki drs. Shailiny Tromp-Lee, no tabata presente.
E parlamentarionan cu a vota pro e ley di matrimonio di mesun sexo ta: Miguel Mansur di ACCION21, Misha Raymond di RAIZ, Raymond Kamperveen di RAIZ, Marisol di MAS, Aquannette Gunn di MAS, Gerlien Croes parlamentario independiente, Mervin Wyatt-Ras di AVP, Mike de Meza di AVP, Benny Sevinger di AVP y Setty Christiaans-Yarzagaray di MEP.
Esunnan cu a vota contra ta Arthur Dowers di AVP, Mike Eman di AVP, Ryçond Santos do Nascimento, Alvin Molina, Hendrik Tevreden, Darlaine Guedez-Erasmus, Marco Berlis, Ricky Hoek, Edgard Vrolijk y Arthur Vallejo tur di MEP. Mientras cu Shailiny Tromp-Lee di MEP a scoge pa no tabata presente den e sala.
Cada parlamentario a trece dilanti nan punto pakico no ta of ta di acuerdo cu e ley di Mmatrimonio di mesun sexo. Mirando cu e resultado di votamento a termina empata, Presidente di Parlamento a indica cu nan lo mester bolbe tene un reunion pa vota.
