Un reunion di parlamento cu mester a sigui pa 2:30 no a continua. Prome cu esey a yama un senioren convent atrobe, despues cu un a tuma luga caba den oranan di mainta.
Gerlien Croes, parlamentario independiente, a bisa cu a yama e reunion aki e anochi prome. Den e senioren convent di mainta a papia riba cuanto persona mester ta presente pa vota.
Despues cu reunion a cuminsa caba, a bisa e Presidente di Parlamento cu loke e ta bisa no por t’asina. MEP kier boycot door di haci actonan inconstitucional door di t’ey pero no vota na final. Of nan kier keda eyden pero abstene di vota. Esaki ta nifica cu mester di 11 persona pa e ley pasa, si tur hende ta paden.
Gerlien Croes a splica cu esey no por pasobra regla ta bisa cu si no ta vota, mester bandona sala. Y di esnan cu keda paden, e mayoria lo mester pa pasa e ley.
Croes a condena loke cu Presidente di Parlamento kier haci. “Ta un berguensa pa pueblo mira e actonan aki pasa. E ta un maniobra politica y falta di respet, di e forma aki ta mira ki tipo di persona ta maneha e pais aki.
Aruba ta pendiente di e fraccion MEP pa mustra ki integridad nan tin,” Croes a comenta. Diferente miembro di oposicion tabatin e mesun comentario, un maniobra politico pa stroba tratamento di e ley di matrimonio di mesun sexo.
