The Confederation of North, Central America and Caribbean Association Football (Concacaf) a scoge Aruba como un di e tres paisnan pa ta anfitrion di e torneo internacional u-15 femenino di 2024, cu lo tuma luga dia 5 pa 11 di augustus. E otro dos paisnan scogi ta Costa Rica y Trinidad and Tobago. Costa Rica lo ta anfitrion pa liga A, Trinidad and Tobago liga B, mientras Aruba ta liga C.
Randolf Lacle, presidente di AVB, a indica cu e anuncio aki di ta anfitrion ta algo grandi. Den pasado varios biaha Arubaanse Voetbal Bond (AVB) tabata anfitrion pa e gruponan di torneo, tanto pa adulto como hubenil. Pero nunca den un grupo asina grandi y e parti femenino.
Pa hopi aña Aruba no tabata por a tene wega internacional y mester a hunga den exterior. Na 2021 a bin un movecion grandi den futbol femenino. E aña ey e seleccion femenino u-14 a titula campeon den e torneo di CFU. E mesun seleccion ey na 2022 nan a hunga den u-15 y a bay final, unda nan a bira subcampeon.
Aña pasa a cuminsa cu un seleccion nobo di u-14. Nan a avansa te yega final, pero a termina como subcampeon. E mesun team ey ta hunga e aña aki den e campeonato di CONCACAF pa u-15. Di mira e trayectorio di e desaroyo di futbol femenino, specialmente den esaki cu e hobennan a pasa, Lacle ta di pensamento cu e ta un gran momento y honor pa tene e competencia aki na Aruba. Asina ey por mustra dilanti propio publico riba e crecemento di futbol femenino.
E weganan lo tuma luga den Stadion Guillermo Trinidad. Diahuebs dos representante di CONCACAF tabata di bishita pa haci un inspeccion riba e stadionnan. Nan a mira cu e trabounan ta bayendo bon, pero ainda tin trabou pa haci ainda. P’e torneo aki nan ta positivo cu e lo tuma luga na Aruba sin problema.
Incluso a check e otro veldnan cu tin, a pesar di no tin yerba nobo pero por fungi como facilidad p’e teamnan haci nan training. Ta tene cuenta cu e teamnan tin di train tambe. A pasa cu nan n’e veldnan di Yara, Franklin Bareño y Frans Figaroa. Nan a mira cu tur tres no ta apto pa hunga wega internacional, pero pa facilidad como training por haci uzo di nan.
Pa mas lesa TREMPAN.COM.
