E aña aki un biaha mas ta tuma luga e competencia di Best of the Best di taekwondo. Prome cu e competencia grandi aki tuma luga, e scolnan di taekwondo mester clasifica. Brazil Taekwondo Stichting ta preparando p’e competencia clasificatorio di Cas Bon Cup.
Clifford Rasmijn, presidente y coach di Brazil Taekwondo Stichting, a indica prome cu e evento di Best of the Best ta tuma luga e competencia clasificatorio Cas Bon Cup. Tanto Cas Bon Cup y Gold Coast Cup semper ta un di e sponsornan cu e campeonatonan cu Brazil Taekwondo Stichting tabata organisa pa hopi aña hunto cu Cas Bon Group.
E compania aki semper a sostene e eventonan di taekwondo cu Brazil Taekwondo Stichting ta organisa. E Cas Bon Cup ta e prome campeonato cu nan ta organisa pa Best of the Best. E campeonato di Best of the Best ta uno grandi y ta esun ultimo cu nan ta organisa. Den e campeonato aki varios pais manera Merca, Corsou, Surnam y hopi mas ta bin Aruba pa competi.
Segun Rasmijn, probablemente tin mas pais cu lo bin pero nan ta wardando riba confirmacion. Tambe el a invita pa e teamnan di taekwondo ta presente pa mira e evento aki, cu ta e prome di clasificacion di Best of the Best.
Fito Croes, director di Cas Bon Group NV, a indica cu Brazil Taekwondo Stichting a acerca nan un biaha mas. Brazil Taekwondo ta organisando e competencia aki pa algun aña y segun Croes, nan ta contento di por aporta n’e competencia.
Brazil Taekwondo Stichting ta haci tremendo trabou den deporte, den e disciplina di taekwondo. Croes a sigui indica cu nan ta contento di mira e progreso cu ta tumando luga cu taekwondo en general. Incluso nan ta contento di mira cu mas hoben ta participa den e deporte aki.
