Dianan 4 i 5 di sèptèmber último a tuma lugá na e siudat Antigua, Guatemala, e enkuentro di konsehonan ekonómiko i sosial di Latino Amérika i di Karibe den kuadro di e ret regional CESALC (Consejos Económicos y Sociales de América Latina y el Caribe), ku a konta riba presensia di representantenan tékniko di kuater konseho, entre otro di SER di Kòrsou.
E témanan ku durante e enkuentro regional a ser presentá, a konsentrá nan mes riba introdukshon i presentashon di e marko general di e ret CESALC, futuro di empleo i retonan pa ku realisashon di empleo digno, e relashonnan nobo di agentenan ekonómiko den un mundu globalisá, futuro di trabou i kambionan den ámbito laboral.
Banda di SER di Kòrsou e enkuentro regional a konta ku representantenan di konsehonan ekonómiko i sosial di Honduras, Guatemala i Repúblika Dominikana. E Konseho Ekonómiko i Sosial di Spaña tambe tabata presente i a interkambiá ku e otronan riba su eksperensha en partikular ku funshonamentu di e ret di konsehonan ekonómiko i sosial di Europa. Tambe Spaña a presentá su vishon pa ku e agènda 2030 pa ku e obhetivonan di desaroyo sostenibel i su vinkulashon ku e agèndanan di maneho ekonómiko i sosial públiko.
Durante e enkuentro regional, a traha tambe riba aktualisashon i konstrukshon di un modelo di maneho i di funshonamentu di e ret CESALC, kual a ser aprobá unánimanente dor di e partisipantenan. Pa e periodo 2019-2021 lo eligí un koordinadó/presidente nobo di e ret. E koordinadó/presidente nobo lo manda pa tur pais den region ku ta afiliá na e ret un plan di trabou pa e promé aña.
Durante e enkuentro na Antigua, Guatemala, tambe a presentá e wèpsait nobo di CESALC (www.cesalc.org).
E paisnan representá na e enkuentro a komprometé nan mes pa sigui konsolidá e ret regional di CESALC komo un instrumento di diálogo, di interkambio di konosementu i di difushon di eksperenshanan nashonal i regional teniendo na konsiderashon ku:
- konsehonan ekonómiko i sosial ta kombirtiendo nan mes kada bes mas i mas den instanshanan stratégiko di diálogo, partisipashon i konsertashon di diferente aktor pa asina duna un kontribushon na definishon i mehorashon di maneho públiko i orientashonnan general di desaroyo sostenibel;
- konsehonan ekonómiko i sosial ta dediká nan mes pa promové prosesonan di diálogo riba témanan nashonal i agèndanan internashonal, asina ei impulsando integrashon entre representantenan ku ta forma parti di e ret CESALC;
- e ret CESALC lo sigui hasi esfuersonan pa promové partisipashon sosial, diálogo i demokrasia den Latino Amérika i den Karibe;
- temanan prioritario di e ret CESALC pa e próksimo añanan lo ta: lucha kontra di pobresa i malnutrishon króniko den Latino Amérika i den Karibe; promové kresementu ekonómiko, progreso, inklushon sosial i desaroyo sostenibel den paisnan di region, formulá plannan di akshon, maneho i programanan regional ku ta garantisá derechonan ekonómiko i sosial na speshalmente personanan ku ta biba den pobresa ekstremo i gruponan vulnerabel manera entre otro hende muhé, muchanan, personanan desabilitá, migrantenan i poblashonnan indígena;
- transmití rekomendashonnan di e ret CESALC na òutoridatnan gubernamental di region, pa asina ei yuda fortalesé i duna prioridat na e debate polítiko gubernamental riba témanan sosial ekonómiko den ámbito lokal.
Pa mas informashon por bishitá e wèpsait di CESALC (www.cesalc.org) i esun di SER (www.ser.cw).
