“Mi ta para pa igualdad y pa derecho igual pa tur hende. No solamente pasobra loke e ley y e toelichting ta bisa. Mi ta papia di curason,” e parlamentario di fraccion di MEP Setty Christiaans-Yarzagaray a expresa den parlamento.
Diaranson parlamento a cuminsa tratamento di e proyecto di ley pa matrimonio di mesun sexo. For di prome cu e reunion a tuma nota cu no solamente tin pensamento diferente den parlamento pero tambe den e diferente fraccionnan tin diferencia di opinion.
Por ehempel den esun di MEP, tin un grupo sigur cu ta contra di e ley debi na nan creencia Cristian. Pero tambe tin esnan na fabor, pa cualkier motibo, manera Setty Christiaans-Yarzagaray. Den un discurso hopi emotivo el a papia di loke el a biba den carni propio den su famia, debi na e orientacion sexual diferente di su ruman.
E parlamentario a bisa cu e ley aki sigur ta uno cu ta mustra cu politiconan den un solo partido por tin diferencia di opinion. “Nos no ta wak otro riba e mesun linea y esey ta democracia. Mi ta respeta tur mi colega pasobra tur ta scogi pa un grupo den comunidad. E no ta solamente den nos fraccion e diferencia, pero tambe den nos famia.”
E ta mas cu duna derecho y el a hay’e ta compronde hopi tempo pasa door cu su ruman tin un orientacion sexual diferente. A conta con e ruman mester a biba sin e relacion familiar solamente debi na su preferencia y ey el a realisa e derecho igual cu su ruman mester tin pa realisa su bida, mescos cu e mes a haci. Den su cas nan no a dun’e su derecho, “imagina riba pais Aruba cu no a duna nan e derecho”. E ta sinti cu a tarda pa duna e hendenan aki nan derecho.
P’e tabata normal pa lanta cu su ruman t’asina pero cu no ta tur hende a acepta e ruman, tabata un trauma di biba sin derecho cu e ley lo no kita. “Mi ruman tin derecho igual na e derechonan cu ami tin. Mi no por lag’e cay, y neng’e su derechonan,” el a bisa. Sinembargo na mesun momento el a bisa cu e ta inclina pa warda e decision di casacion mirando cu el a aproba pa Aruba bay busca conseho di casacion.
