E prome oradornan den parlamento a mustra e diferencia di opinion cu a papia di dje caba prome cu e reunion riba matrimonio di mesun sexo.
E reunion a habri cu Ryçond Santos do Nascimento, kende a ustra di ta fervientemente contra e cambio pa permiti matrimonio di mesun sexo, manera por lesa den otro articulo.
Despues a sigui e orador Marco Berlis, kende a bisa cu matrimonio di mesun sexo no ta un derecho humano, segun EHRM (Hof Europeo di Derecho Humano), den palabranan di parlamentario Berlis di fraccion MEP. El a mustra riba e hecho cu tin 125 nacion na mundo, y apenas 35 tin e ley aproba. P’esey e ta bisa cu cada nacion tin derecho pa scoge con ta atende cu e tema.
E ta sinti cu ta biba den un era unda kier redifini “nos balornan y principio den comunidad. Tin un poder cu kier redifini nos sociedad riba temanan cu ta defini caba.” Pa su persona, definicion di matrimonio desde inicio di humanidad ta entre homber y hende muhe. Y a mustra con na Canada ya caba un persona por casa cu un popchi, y tin caminda cu un mata. Y ta yama esey matrimonio. Y esaki ta algo cu no por tolera.
Parlamentario Guedez-Erasmus di su banda a mustra cu Aruba tin 40 iglesia Cristian, sin con esunnan cu no ta registra. Di otro banda mester tene cuenta cu 75% di e poblacion ta catolico. Y esaki ta bay en contra di e pensamento di matrimonio di mesun sexo.
Parlamentario Mike de Meza di su banda a bisa cu e no a bini pa critica niun hende ni grupo of organisacionnan riba e pensamento di matrimonio di mesun sexo. Echo ta cu e ta un topico grandi na hopi pais na mundo y hasta leynan cu no tabata existi, a crea pa por realisa matrimonio civil entre parehanan di mesun sexo.
Na final, e politico a bisa, articulo 1 di Constitucion ta bisa cu tur hende tin e mesun derecho; mester trata tur hende di e mesun forma; y tur hende tin derecho igual, bou di circunstancia of situacionnan igual y cu no ta permiti pa discrimina. Aki no ta bay riba e pensamento religioso pero simplemente e derecho di cada ciudadano. Y a mustra na mundo tin 500 miyon persona cu un orientacion sexual diferente y cu no por ignora nan derecho.
Mervin Wyatt Ras di su banda a admiti cu e ley ta uno controversial y ta mara na hopi tabu, na hopi pensamento di balor y normanan, etc. Sinembargo e no ta algo nobo ya cu for di 2016 a pasa un ley cu a adapta esaki via di un amienda y cu den e ley di Codigo Civil nobo a permiti e union registra.
