Diaranson, durante tratamento di e Ley di Matrimonio Homosexual, por a tuma nota di Otmar Oduber, ex- Minister y ex-Parlamentario di Pais Aruba sinta den tribuna. Oduber a indica cu, ta cu despues di hopi aña, cinco pa ta exacto, e ta bek den sala di parlamento. Pero e biaha aki, no n’e prome piso, mas n’e segundo piso, como un miembro mas di publico.
Tabata un topico interesante, pero tambe importante pa e comunidad di Aruba. El a bin pa biba di cerca e sentimentonan cu ta biba den e pueblo, pero tambe pa experiencia e forma con ta hiba debatenan di un tema asina interesante y importante pa nos comunidad. Den e tres discursonan cu a hiba. Loke a resalta p’e, tabata cu e no a scucha e parti di fundeshi di loke ta e derecho di e ser humando cu ta wordo discuti.
Tabata ocho pasa cu e tabata forma parti di e Gobierno di AVP, di asignatura berde y e mester bisa cu ta un lastima cu te awe ainda, e mesun discusionnan ta sigui. Tin hopi bruhamento di tera tumando luga, caminda cu ta mete religion den e discusionnan aki.
Varios politico ta prefera di sconde tras di e parti religioso, sin wak e derecho di un ser humano den nos pais. E ta ancra den articulo 1 di nos constitucion no ta permiti discriminacion y tampoco por permiti cu no tin derecho igual pa tur esunnan cu ta biba riba nos isla. Esey ta loke no a bin dilanti den e disertacionnan.
Ta purba impone religion riba e derecho constitucional di cada ciudadano. Si Aruba a keda pega den tempo, lo awendia nos pais lo no tabatin un ser femenino como un prome minister.
Ta un lucha cu a hiba pa varios decada y cu awe ta gosa di su frutonan. Mescos ta conta pa e comunidad homosexual riba nos isla, cu nan derecho tambe ta conta.
