“Cu un sorpresa awe mainta mi tabata scucha parlamentario Do Nacimiento y Berlis papia riba nan argumentonan pa no aproba e ley di matrimonio di mesun sexo. Nos ta para na fabor di e ley y mi argumento ta uno masha simpel.” Tabata palabranan di Leonardo Figaroa, kende a aparece riba e lista di Accion21 durante e ultimo eleccion, y actualmente fundado di Partido Direccion Politea (PDP)
Discriminacion!
E ta haya cu mester simplemente pensa riba e relacion entre un ciudadano su derecho y deber. E pregunta importante cu mester haci ta dicon e parlamentarionan contra e ley di matrimonio di mesun sexo no kier pa e ley drenta den vigor, pero si e comunidad mester paga belasting. Belasting cu ta wordo paga pa cubri pensioen AOV/AWW, a caso esaki no ta discriminacion?
Ta papia riba e famia tradicional, pero ban ta sincero cuanto mayor no ta educando nan yiunan manera mester ta den e famianan tradicional. Hopi biaha den e famia tradicional aki “nos ta haya uzo di alcohol y droga, abuso relacional y hopi otro mas. E ta importante pa para keto riba e echonan aki.”
Hurisprudencia di casacion (Cassatie rechtspraak)
“Pa mi tene mi reaccion riba e argumento di mr. Evelyn Wever Croes regardando casacion ta hopi simpel. Ta dificil pa su persona convence e achterban di MEP cu ta hopi conservativo pa por sostene un ley asina. Esaki tabata e minister-president cu a para den debate di KVK y Millenial y a bisa pueblo di Aruba cu e ta para pa inclusion. E inclusion awe cu nos ta biba na su man como minister-president ta cu e dicidi di bay den casacion.
Si nos lesa e conclusion di advocaten-general mi ta kere nos por conclui cu e ta importante pa nos realisa cu e hecho cu aworaki nos codigo civil ta discrimina. Nos tin cu realisa cu casacion ta rechtspraak (e poder hudicial) y e echo cu parlamento ta introduci e ley ta e tarea legislativo. Nos tin e separacion di poder, esaki ta importante pa asina nos por comprende cu netamente e argumento no ta valido cu mester warda riba e hurisprudencia di casacion (cassatie rechtsspraak), paso mi ta positivo cu e recurso di casacion (cassatiemiddel) di gobierno lo wordo anula (vernietigd), paso nan no a wordo bon splica.”
Separacion di Misa y Ley
Trias politica a wordo introduci door di e revolucion Frances cu tabata e inspiracion. Pakico? Netamente e ta importante pa tin e separacion aki. Esaki ta pa por garantisa tur grupo den comunidad representacion y tambe no obstante cu e minoria no tin un bos. E ta importante pa saca e argumento di cristianismo for di e debate politico.
Esaki no tin nada de haber cu un grupo di politiconan progresivo cu kier pusha un agenda LGBTQIA+, pero e tema ta riba un echo cu ta violando articulo 1 di Constitucion. No tin mucho pa discuti, e ta violando e ley y e ta contra e prohibicion di discriminacion (discriminatieverbod) cu e Staatsregeling ta duna tur ciudadano derecho.
“Mi kier a recorda Berlis cu MEP ta un partido socialista, iskierdista ta nan posicion den politica, pero mi ta sinti cu e MEP di awe a lubida kico nan lider honorario Betico Croes su intencion tabata regardando e movemento cu el a funda hopi decadanan atras,” Figaroa a bisa.
Sosten di 18 mil firma
Un otro argumento ta e echo cu no tin sosten (draagvlak) pa e cambio pa introduccion di ley di matrimonio si mesun sexo. Pero e pregunta importante cu nos mester haci ta ken ta e grupo di referencia? E 18 mil personanan aki tin derecho di voto den e eleccion na 2025? Ta personanan documenta? Cu tin un status documenta? E motibo pakico e ta haci e preguntanan skerpi aki ta cu e ta importante na momento di colecciona firma cu mester percura cu cada firmante tambe por vota. Anto e ora ey sigur por papia di un populacion representabel pa bisa cu tin sosten (draagvlak).
E vision
PDP ta kere den dialogo, e ta importante pa sinta cu e lidernan di misa pa splica nan tocante e derechonan constitutional, no solamente e articulo 1 cu ta papia riba e prohibicion di discriminacion (discriminatieverbod), pero tambe e articulo I.15 inciso 1 e derecho di ta liber pa scoge nan religion y creencia. “Nos ta un partido social-liberal progresivo esaki kiermen cu nos ta PRO e ley di matrimonio di LGBTQIA+. Nos ta kere cu e ta importante pa introduci e ley aki y di e forma aki pasa e discriminacion cu tin actual pa laga esaki pasa pa pasado.”
