E ex Minister di Petroleo y ex Presidente di PDVSA, Nelson Martinez, deteni desde fin di 2017, a fayece awe, segun tres fuente di e industria a bisa Reuters. Martinez, kende a presidi e filial di PDVSA na Merca, CITGO, a wordo aresta na November aña pasa, acusa di corupcion pa negocia un financiamento sin autorisacion.
E ex Minister tabata deteni na sede di e direccion di contra inteligencia militar na e parti oost di Caracas, a wordo traslada varios siman pasa pa un centro di asistencia debi na fayonan renal. El a sufri un ataca di curason awe, mientras cu e tabata wordo dialisa, un di e fuentenan di PDVSA a bisa. Di acuerdo cu otro dos fuente, Martinez a wordo hiba na e Hospital Militar door di a sufri diferente padecimento – entre nan di riñon.
“Nan a neng’e atencion medico oportuno,” un di e fuentenan di PDVSA a bisa, cu a papia bao di condicion di anonimato y a informa cu e ex funcionario tabata den terapia intensivo.
Otro fuente a bisa cu e abogadonan di Martinez, un kimico di profesion, a cuminsa pidi algun luna pasa, pa nan concede detencion na cas debi na su problemanan di salud.
Dos di e fuentenan a bisa cu Martinez tabata deprimi pasobra su audiencianan semper tabata diferi y no tabata mira salida na e situacion. Nunca nan a bis’e ni sikiera su audiencia preliminar, segun un di tres fuente. Ni e Ministerio di Petroleo, di Comunicacion, PDVSA of Fiscalia General a responde di inmediato riba peticion pa haya un comentario.
Nelson Martinez a drenta PDVSA na aña 1980 y tabata director di e oficinanan di e empresa na London, Argentina y Ecuador. Tambe a presidi PDV America. Na 2013 a nombr’e Presidente di CITGO.
Na Januari 2017 el a wordo designa pa Presidente Nicolas Maduro como Minister di Petroleo y na Augustus el a wordo poni na front di PDVSA, como Presidente di PDVSA, na luga di Eulogio del Pino, kende tambe a wordo deteni na November y ta sigui encarcela.
