Aruba Hotel & Tourism Association (AHATA) a publica cifranan di ocupacion y prijs di hotelnan pa luna di November 2018. E porcentahe averahe di ocupacion di hotel (Occupancy Rate) tabata 83.2%, un caida di 2.9 punto compara cu November aña pasa. Di otro banda e balor di camber ta sigui ta mas halto cu aña pasa pero e crecemento ta birando menos.
ADR (Average Daily Rate – e prijs averahe pa cada camber bendi) a subi 10% compara cu aña pasa pa yega $231.31. RevPAR (e entrada averahe pa tur camber disponibel) tabata $192.54 na November 2018, un aumento di 6.4% compara cu un aña pasa.
Esaki ta nifica cu aunke e cantidad di turista kedando na hotel ta menos, e hotelnan a logra cobra mas pa e cambernan. E luna di November tabatin un ocupacion un tiki mas halto cu esun di September y October, locual ta un patronchi normal.
Pa e prome 11 lunanan di 2018 compara cu mesun temporada na 2017, a logra un aumento den RevPAR di 10.6% pa un averahe di $221.41, pero ocupacion a baha un tiki cu 0.6% na un averahe di 84.9%.
Tisa LaSorte, CEO di AHATA, a splica cu aunke ainda ta cobra un prijs mas halto pa cada camber, e crecemento den prijs a cuminsa reduci e ultimo dos lunanan. E cifranan a cuminsa normalisa despues cu e ultimo 12 lunanan Aruba a beneficia di e cantidad di hotelnan cera den region Caribe pa motibo di daño di horcan na September 2017. Recientemente, e hotelnan na otro islanan a cuminsa habri bek cu camber ful renoba. Ta importante pa Aruba sigui mercadea efectivamente y pa nos isla por mantene un bon demanda como destinacion, locual lo yena cambernan y influencia un RevPAR mas halto.
- Amsterdam Manor Beach Resort
- Barcelo Aruba
- Boardwalk Hotel
- Brickell Bay Beach Club
- Bucuti & Tara Beach Resort
- Divi & Tamarijn All-Inclusive
- Hyatt Regency Aruba
- Manchebo Beach Resort
- Marriott Aruba & Stellaris Casino
- The Mill Resort
- Renaissance Aruba Resort
- The Ritz-Carlton
- RIU Palace
- RIU Antillas
- Talk of the Town Hotel
- Tropicana Aruba Resort
