Wardacosta, Polis y otro autoridad competente, lo bay haci control riba lama y na e
costanan durante Fuikdag 2023.
Meta di e controlnan aki ta pa garantisa cu hende mantene nan mes na e medidanan cu gobierno di Corsou a stipula pa e dia aki y pa mantene orden publico durante Fuikdag 2023. Wardacosta a informa e doñonan di boto di placer ‘charterboats’ y/of seadoo, pa tene cuenta cu e reglanan ta valido pa e dia aki.
A base di e medidanan, lo no permiti benta di alcohol durante Fuikdag, no ta duna permit pa
musica publico riba flota of podium, tur boto cu ta participa na e evento, aparte di nan
‘scheepdocumenten’, mester tin suficiente vest di salbabida abordo, esaki conforme e cantidad
permiti di pasahero abordo, ademas artefactonan apropia di señal, como tambe fluit mester ta abordo. Lo tin control riba tur e rekisitonan aki di boto door di Haven en Veiligheid Inspectie y Wardacosta.
Ademas servicio di bombero ta efectua control pa loke ta cendemento di candela abordo, pa
preparacion di BBQ. Despues di 5:00 pm no ta permiti pa sigui toca muziek, como tambe lo tin control na bahianan pa evita aglomeracion na playa.
No ta permiti e asunto di hiba y trece hende, cu otro palabra hende cu tin nan propio boto so por yega Fuikbaai. E medida aki ta necesario pa motibo cu hopi ta esunnan cu ta tuma ‘cabe’i boto’ y ta keda pega na Fuikbaai, sin por yega Caracasbaai mas.
Consecuentemente nan ta purba cana via tereno priva di Barbara Beach pa yega ciudad. Tur esaki unicamente ta contribui na mas caos y como tal no ta keda tolera. Tur boto cu ta bin di otro pais y bin bishita Corsou ta obliga di pasa migracion como tambe Duana pa ‘klaar in’.
Wardacosta, cuerpo policial y demas autoridad competente encarga cu mantencion di orden publico, lo atende debidamente contra tur esunnan cu no tene nan mes na e medidanan menciona.
Autoridadnan cu lo ta presente pa controla durante Fuikdag y duna asistencia riba e dia aki ta, Wardacosta, Cuerpo Policial, Haven en Veiligheid Inspectie, Brandweer, Duana, Santa
Barbara Security, Rode Kruis, Fundacion Cuido Ambulance Corsou y Citro.
