E conmemoracion nacional di Dodenherdenking den un ceremonia riba De Dam na Amsterdam, a tuma luga diasabra sin mayor incidente, aunke a realisa cuater aresto relaciona cu disturbio y protesta. Durante e dos minuutnan di silencio pa 8:00 pm, tur cos a keda trankil a pesar di e preocupacion di siguridad relaciona cu e situacion na Gaza.
E prome aresto a tuma luga ora cu un homber di 53 aña fo’i Amstelveen a purba di habri un spandoek, loke a interumpi e ceremonia un rato. Otro dos aresto a tuma luga poco despues: un homber y un muhe di nacionalidad Ugandes cu supuestamente lo tabata relaciona cu e homber cu a purba di habri e spandoek.
Segun polis, e interupcion a tuma luga prome cu e momento di silencio, pa cual cu no a afecta e dos minuutnan di silencio.
Den un declaracion, e abogado di e detenidonan, Willem Jebbink, a bisa cu su clientenan kier a yama e atencion riba e situacion politico na Uganda y a critica e financiamento di Hulnda n’e presidente Ugandes, Yoweri Museveni. E manifestantenan ta considera hipocrita cu e rey Hulandes, Willem-Alexander y e prome minister ta predica cu un genocidio manera esun di Segunda Guera Mundial no por ripiti mientras cu nan ta financia un regimen controverti.
Despues di e momento di silencio, tabatin un di cuater aresto: a detene un hoben di 24 aña fo’i Nijmegen, pasobra polis a ricibi informacion cu su declaracionnan den un transmisio live via TikTok por hiba na un posibel disturbio di orden publico. Un vocero di polis a indica cu e hoben lo a keda deteni pa investigacion adicional.
E Dodenherdenking na Waalsdorpervlakte, den vecindario di Den Haag, tambe a tuma luga sin incidente. Contrario n’e ceremonia riba De Dam, e conmemoracion aki tabatin acceso liber, cu por lo menos 3 mil persona presente. Nan por a observa e tradicional batimento di e bel di Bourdon.
E aumento di siguridad y control adicional riba De Dam ta refleha e precaucion p’e posibel disturbionan, specialmente debi n’e situacion actual na Gaza. A pesar di e tensionnan, e Dodenherdenking riba De Dam y na Waalsdorpenvlakte a tuma luga cu respet y manteniendo e proposito di recorda e victimanan di Segunda Guera Mundial.
