Aruba un biaha mas ta para na un otro temporada di Carnaval, despues di un fin di aña sumamente druk. E aña aki Aruba ta celebra Carnaval 69 y ta bin bek di un break di dos aña door di COVID-19.
Cuerpo Policial di Aruba ta cla pa Carnaval. Y diaranson mainta, Cuerpo Policial tabata tin un reunion cu tur e stakeholdernan y SMAC, unda cu a pone e ultimo detayenan di e aña aki, pa asina diasabra, dia 7 di januari por ranca sali cu e prome parada cual lo ta e Parada di Flambeu.
Liliana Rasmijn, vocero suplente di Cuerpo Policial Aruba a bisa cu oficialmente tin seis grupo y e parada ta programa pa sali pa exactamente 8:00pm y lo caba 2:00am. SMAC y tampoco Cuerpo Policial lo bay warda riba niun hende, tur hende mester zorg pa nan ta na ora. Cu banda of sin banda, e parada ta ranca sali 8:00pm.
Rasmijn a sigui bisa tambe cu nada no a cambia, e controlnan prome, durante y despues di e parada tambe ta na vigor cu e famoso ‘Faya bo haya’, for di 6:00pm di diasabra te cu di diadomingo 6:00am. E ruta ta keda mescos.
Mas aleu, el a sigui bisa cu Cuerpo Policial semper tin un draaiboek pa loke ta e paradanan. Por ehempel, pa diasabra awo, Hefe di Playa ta maneha e parti ey, cu ta dicidi cuanto polis ta bay tin ariba pia. Ta calcula cu pa diasabra awo lo tin entre cinco cu seis mil persona riba pia, tanto den participante como den esunnan cant’i caminda.
E parada lo cuminsa den Avenida Milo Croes, dilanti di Home Fun Center y lo caba na ex-DOW.
