E hungadonan di beach tennis di Aruba a demostra un biaha mas nan dominio den e sport door di gana den diferente categoria durante e prome ABC Beach Tennis Cup anual, cu ta inclui hungado di Aruba, Corsou y Boneiro.
E organisacion di Beach Tennis Bonaire, como parti di e Bonaire International Week, a presenta e edicion di e torneo di maart 31 te cu april 2, aki ta caminda cu Aruba a forma parti di e evento cu 22 atleta formando parti den diferente categoria.
Maria Buuts y Eugemine Ignacio a gana den e categoria di Open Women (highest level of play), mientras Wayne Tromp y Jelle Groenendijk a gana den categoria Open Man (highest level of play).
Paola Ordoñez y Valery Karsten a gana den categoria Advanced Women, mientras Joke Hertogen y Jenna El Oualkadi tabata runner-up den dicho categoria. E talentonan hoben, Thyshawn Dammers y Sebastian
Dominguez, a bay cas cu premio den categoria Advanced Men.
Marc Kiezebrink di Beach Tennis Aruba a comenta cu, “Nan ta extremadamente orguyoso di nos hungadonan y nan logronan den e ABC Beach Tennis Cup. Nan exito ta testimonio di trabou duro y dedicacion maximo di tur hende envolvi den e mundo deportivo aki na Aruba. Beach Tennis ta birando sumamente popular den e islanan ABC y nos ta entusiasma di mira nos hungadonan encabesa e caminda den e islanan ABC”
E desaroyo continua di beach tennis ta necesario pa su crecemento y exito. Aruba ta comprometi pa traha den colaboracion cu e islanan bisiña pa sigui organisa tournament y evento pa sostene y promove e deporte di beach tennis.
Pa mas informacion riba Beach Tennis Aruba, por subi nan website: www.beachtennisaruba.com.
