Miguel Mansur, miembro di parlamento pa fraccion di Accion21, a haci diferente pregunta na prome minister den cuadro di e proyecto di ley entrega riba matrimonio di mesun sexo. Net un dia prome cu tratamento di e concepto di ley aki den parlamento, Mansur a haya contesta riba preguntanan cu el a haci y rapportnan cu tin di haber cu e proyecto di ley cu e tabata firmante.
Den e preguntanan cu el a haci tabata con e ley aki lo afecta e funcionamento di Censo y kico e lo costa den recurso financiero.
Informacion suministra door di Dienst Burgerlijke Stand en Bevolkingsregister (DBSB) ta mustra cu adaptacion di e sistema ICT na DNSB ora cu habri matrimonio di mesun sexo lo costa rond di cinco mil euro y despues mas o menos 1050 euro pa aña.
Di otro banda, e lo no trece ningun gasto adicional pa loke ta personal. A mustra cu tempo a introduci e asina yama geregistreerd partnerschap tampoco el a trece gasto di personal adicional. Esaki a pesar cu e tempo ey tabata introduccion di un registro completamente nobo.
Pa haci un comparacion di kico por spera na e cantidad di matrimonio di personanan di mesun sexual, nan tin e siguiente informacion pa loke ta e partnerschap cu ta existi desde aña 2021.
Te aworaki, den tres aña, a registra solamente 33 union. Na aña 2022 tabata esun di mas hopi ora cu 24 pareha a registra nan union. Pero si ta papia di union di parehanan di mesun sexo, tabatin 20 union registra mientras cu 13 tabata di pareha di diferente sexo.
Mirando cu desde 2009 por mira un caida den e cantidad di matrimonionan registra, no ta kere cu momento cu habri matrimonio pa pareha di mesun sexo, esaki lo no nifica un aumento den e trabounan di DBSB.
