Na hopi ocasion, ora cu ta privatisa compania, ta existi un grupo selecto di hende cu parce ta beneficia economicamente di e situacion. Esaki ta trece pregunta riba e etica y e husticia di e proceso.
Den un entrevista miembro di fraccion di AVP, ing. Mike de Meza, a señala algun practica dudoso encuanto privatisacion y faboritismo den e contexto di e empresanan estatal na Aruba.
Caso di privilegio den e empresanan estatal
De Meza a menciona RDA como ehempel cla di un compania estatal caminda cu por observa faboritismo. El a papia riba con hende con conexion familiar y social cercano n’e gobierno ta ocupando posicion clave dentro di e empresa.
Segun e parlamentario, RDA, cu ta lucrativo, a señala un deficit anual di 15 miyon florin na parlamento, loke ta genera duda riba e maneho financiero y unda e placa aki ta bay. El a menciona cu tin hende cu tin relacion familiar cercano n’e prome minister y e otro politiconan, ta ocupando posicion importante, loke ta trece preocupacion riba e uzo indebido di recurso publico.
Problema den tratamento di awa residual
Otro tema relevante menciona pa De Meza tabata e problema cu e sistema di tratamento di awa residual na Bubali. E parlamentario a expresa su preocuacion p’e creciente densidad di hotel den e zona y e riesgo cu e ta representa pa medio ambiente.
El a sugeri cu, na luga di construi un planta di tratamento den e mesun area congestiona, mester explora alternativa pa minimalisa e impacto ambiental y evita riesgo futuro.
Falta di planificacion y transparencia
De Meza tambe a señala e falta di planificacion y transparencia den varios aspecto di gobierno. El a critica e ceramento di e dump na Parkietenbos sin un plan cla pa maneha e situacion. El a indica cu e solucionnan proponi p’e gobierno parce tabata improvisa y no tabata respalda pa un strategia coherente. El a menciona cu e unico plan di e minister responsabel, tabata un concurso di pinta, loke ta mustra un falta di seriedad y compromiso cu e solucion di e problema.
