Dia di 5 di mei proximo, marca den bo kalender p’e fundraising event di Kiwanis Young Professionals Aruba (KYPA) cu lo tuma luga den Bochincha Containeryard Aruba.
Raynedrick Koolman, PR director di KYPA, splica cu nan ta un club cu ta organisa diferente proyecto p’asina duna bek na comunidad.
KYPA ta un club caritativo y door di proyecto cu nan ta haci, por ehempel Christmas in a Box cual ta un di e proyectonan di mas grandi como club, ta recauda fondo door di recauda comestibles pa duna bek na comunidad specialmente mucha.
Pa haci tipo di proyecto aki, e club naturalmente mester di fondo. P’esey como un club hoben, consistiendo di 30 pa 40 young professionals, lo bay organisa nan evento anual cu yama e biaha aki ‘Night of Glamour’ cu lo tuma luga den Bochincha mes cu e tema di ‘Cinco de mayo’. E evento aki lo tuma luga riba dia 5 di mei mes, cuminsando fo’i 9:00 pm te cu 2:00 am cu varios banda cu lo sa di entretene y pone ambiente e anochi aki.
P’e anochi aki, entretenimento lo ta den man di Tsunami, hunto cu Youth X-treme. Tambe lo tin Kemp Brothers cu lo join y DJ Kash, cual ta un fellow K. Cu esaki ta extende un invitacion pa un y tur, tur young professionals, tur compania, pa duna un man n’e evento aki p’e bira uno exitoso, p’asina sigui cu tur e proyectonan cu tin pa duna bek na comunidad, specialmente n’e muchanan.
Erwin Ras t’e fundraising director pa KYPA. El a indica cu nan lo bay tin un tremendo anochi riba e fecha aki. Awo con pa cumpra ticket. Esey ta facil. Segun Ras, por acerca un di e miembronan di KYPA y lo manda un link caminda cu por registra e ticket, etc. E lo ta full digital. Ta haya un QR Code, unda cu riba e anochi aki ta scan esaki, drenta den Bochincha y asina por disfruta e anochi.
Lo bay tin un corporate package p’e companianan cu kier yuda cu sponsor. KYPA ta un organisacion sin fin di lucro y tur cos cu nan haci ta boluntario, dunando asina bek na comunidad. Ta algo cu KYPA ta haci cu hopi pasion pa nos comunidad y nos hobennan.
Pa mas informaion y ticket por tuma contacto cu Erwin Ras mes na number 5631510 of cerca cualkier miembro di KYPA. Tambe por sigui nan riba nan pagina di Facebook unda cu tin tur informacion disponibel.
Esaki sigur lo ta un fiesta inolvidabel. Como club di hoben entre edad di 25 pa 45 aña, un y tur sa kico pa spera di nan. Ta cara conoci y tambe lo tin banda cu lo pone ambiente henter aña vooral den Carnaval. E lo bay ta un Open Bar y snacks. Ticket single lo costa 200 florin, ticket pa pareha ta 350 florin. Lo tin pakete p’e companianan, cuminsando fo’i 5 ticket na balor di 1000 florin y 10 ticket na balor di 2 mil florin.
Si tin compania cu kier yuda den un ke otro manera, nan ta mas cu bonbini pasobra na final di dia, tur ta boluntario cu ta traha hopi duro pa duna bek na comunidad, specialmente e muchanan.
