Manera ya ta konosí, X- Team ta aktivo atrobe i mas determiná pa atendé ku tur esnan ku ta susha nos bunita isla. Durante dianan ku a pasa mes a gara diferente di esnan ku ta hasi nos isla daño dor di dùmp sushi na sitionan ku esaki no ta permití.
Banda di e dùmpmentu di sushi ilegal, komunidat tin hopi molèster tambe di esnan ku ta koba greis ilegal i sende sushi òf mondi na kandela. Esakinan ta delitonan penal ku X-Team lo aktua kontra dje i lo verbalisá esnan responsabel.
No ta permití koba greis sin mas. Na promé lugá tin áreanan destiná den EOP komo área di konservashon riba kual bou di niun sirkunstansha no ta permití koba greis. Pa koba greis den e áreanan ku esaki ta permití, mester pidi un pèrmit válido na Domeinbeheer. Pues kobamentu di greis sin pèrmit ta algu kastigabel i X- Team ta aktua kontra esnan ku ta hasi nan mes kulpabel na e delito aki.
Kimamentu di sushi òf mondi tambe no ta permití. Tampoko kima mondi den kuadro di agrikultura. Segun Landsverordening Openbare Orde artikulo 57 lid 2 ta prohibí pa sende kandela òf laga sende kandela ku por forma daño òf molèster pa otronan. Regularmente ta drenta kehonan relashoná ku molèster di huma na Maneho di Medio- Ambiente i Naturalesa. P’esei X- Team lo bishitá tur e sitionan aki i lo verbalisá tur esnan ku ta kousa molèster pa habitantenan den serkania.
