Otmar Oduber durante programa live ‘Nos Realidad Cla y Raspa’ a elabora riba gastonan halto di gobierno. Invitadonan den e programa tabata Anselmo Pontilius, experto laboral y Ivo Valdez Presidente di OPPA.
Oduber a expresa cu ta conoci cu gastonan di gobierno ta extremadamente halto y ta papia riba esaki unicamente ora tin un medida na caminda, ora cu ta bin cu ahustacion of ora gobiernonan kier trece un cambio den cobransa. Lamentablemente despues di dje, ora e cambionan a wordo introduci, ta bolbe reina un silencio.
E ta considera cu gremio y politica (tur partido, tanto den gobierno como den oposicion) mester bin hunto den un dialogo nacional cu e meta pa e proximo gobierno baha su gastonan cu alrededor di 12%.
Anselmo Pontilius ta considera cu un debate riba e tema aki merece un dialogo nacional. E ta indica cu den rapportnan di ultimo 25 añanan, inclusivo esun di Aruba 2025, ta bin un serie di recomendacionnan pa loke ta gastonan operacional gubernamental.
Un di e gastonan aki ta edificionan di gobierno cu no ta den uzo, cual segun Otmar, ora e tabata minister di Infrastructura 5 aña pasa, tabata aproximadamente 30 edificio di gobierno cu no tabata den uzo pa un periodo di entre 4 pa 25 aña. Un di e puntonan cu Plataforma Nos Pais a manda pa gobierno di Aruba pidiendo pa un dialogo nacional, ta atende cu e tema aki. E ta bisa cu tin 30 edificio balora na aproximadamente 400 miyon Florin cu ta para, cu no ta hayando belasting ni nada otro for di nan; pero mientras tanto tin otro edificionan na huur cu sigur ta mas cu 30.
“Gobierno por ta no tin e placa pa drecha e edificionan aki y p’esey a laga un ley atras pa cual bo por a hincanan den loke nos a yama e tempo ey ‘Aruba Property Fund’ , kiermen den un NV di gobierno y asina tin e capital pa subi mercado y cada aña por ehempel, por bisa cu ta bay drecha 3 pa 5 di e edificionan aki. Esaki los di presupuesto di Aruba”, Otmar Oduber a comenta.
Ivo Valdez a menciona e parti di leasemento di auto caro, cual e no ta wak motibo pa haci esaki y cu ta contribui na aumenta gasto di gobierno.
Ademas di esakinan tin un serie di departamento cu por wordo considera overbodig, cu por wordo privatisa generando asina un entrada pa gobierno manera ta DTI, DTP, Directie Scheepvaart y Directie Luchtvaart.
Logicamente e puntonan aki ta importante, pero ta puntonan cu ta existi no di awo, sino pa casi 25 aña caba, p’esey Otmar Oduber ta puntra ki accion por wordo tuma, kico gremio sindical por haci y bisa gobierno cu a yega e punto cu te aki ta yega ( y ta conta pa tur gobierno). A yega di traha riba diferente rapport manera menciona, pero tambe kernkaten analyse y otronan pero nunca a bay ni un stap dilanti.
Importante pa menciona ta e echo cu esunnan presente den e programa ta considera cu por yega na un acuerdo cu ta bin entre 5 cu 7 minister (no mas), mara e cantidad di ‘coordinador’ na un budget y no na cantidad di hende y tambe e punto cu na final di añanan 80 sindicatonan a señala cu mester depolitisa e nombramento di empleadonan publico. E puntonan aki por wordo yega na nan si gremionan cera cabes hunto y bisa politica na Aruba pa ‘ban traha pa e pueblo’ y stipula na loke e siguiente gobierno mester atene na dje pa loke ta nombramento, cantidad di minister y cantidad di placa cu ta wordo gasta den coordinadornan.
Finalisando e consenso cu a yega ta cu ta importante y urgente pa tur gremio sindical y comercial reuni cu politica y yega na acuerdonan duradero y bindend, pero tambe pa tin e disponibilidad pa cada tanto tempo ahusta esakinan dentro di e realidad cu ta bibando.
Segun Oduber “ e momento ta awo, prome cu e siguiente eleccion, y yega na acuerdonan cu e siguiente gobierno na turno lo mester atene su mes na dje. Pa por logra esaki mester tin cojon, curashi pa tuma desicionnan.”
