Diabierna anochi por bisa cu caya tabata hopi druk, kisas door cu e ta antesala di un diasabra festivo cu e celebracion di Dia di Rey.
Cuerpo Policial di Aruba tabata mannan yen cu tanto asistencia, uno tras di otro. Tabata pa mas o menos 11:25 na Bubali, dilanti E Boco, a bin haya un auto cu cu e tabata buscando pa basta rato caba. Ta trata aki di un auto Renault color shinishi, A-44679. Testigonan a bisa cu ta for di basta rato caba e tabata coriendo iresponsabel riba caminda y trece trafico na peliger.
Patruya a bin encontra e homber aki, cla pa sali for di e bar E Boco y cla pa sigui su paranda.
Mesora polisnan a chang’e y asina strob’e di subi caminda. Na mas di un ocasion a dun’e chens p’e supla, pero e aparato di supla no tabata detect’e. Na final, a detecta cu el a surpasa e limite di alcohol permisibel pa ley, pa cual a bay over na su detencion.
E homber aki, ora el a ripara cu e no tin scapatoria di polis, a cuminsa yora ora cu a hib’e p’e transportwagen cu tabata sperando riba dje pa transport’e pa warda di polis.
