Recientemente Minister Turismo, Dangui Oduber tabata invitado den e programa No Filter in Paradise, caminda a papia hopi riba su maneho como minister pero tambe plannan pa futuro. Un punto sigur a hala atencion, ta ora a comenta riba su futuro como politico.
E presentado di e programa a puntr’e si e ta aspira pa bira lider di MEP, mirando cu su tata a fungi no un sino cuater bes como prome minister di pais Aruba. Oduber a contesta bisando cu; “Mi ta cla p’e.”
Dangui Oduber no ta un figura desconoci riba e lista di MEP. E ta yiu di ex- Prome Minister, Nelson Orlando Oduber, ultimo eleccion, el a aparece como candidato number #3 riba e lista geel. Como candidato #3, el a logra 2060 voto riba su nomber, haciend’e e di dos persona riba lista di MEP cu mas hopi voto y di cuater politico cu mas hopi voto na Aruba sigui pa:
1. Evelyn Wever-Croes (MEP): 7518
2. Mike Eman (AVP): 6668
3. Marisol Tromp (MAS): 4191
4. Dangui Oduber (MEP): 2060.
Por lo menos, campañadonan hopi cerca di Oduber a vocifera despues di resultado di eleccion 2021, cu “something is fishy” cu e resultado. A sigura cu Dangui a haya mucho mas voto, pero ta sospecha cu a hunga cu e votonan pa e lider di e partido.
Nos ta casi un aña leu di eleccion y mayoria politico ya ta den modo di campaña caba. Oduber durante e programa di No Filter in Paradise a sigura cu e ta cla pa e reto di tuma liderazgo di MEP si e oportunidad presenta. El a mira su tata goberna nos pais na cuater ocasion como prome mandatario y claro, como yiu di Nel, e ta aspira un funcion asina tambe. Ora e puntr’e riba su number riba lista, el a contesta bisando cu, el a cuminsa como candidato number #6, sigui pa candidato number #4 y ultimo eleccion a yega te cu candidato number #3.
El a bisa e presentado di e programa, pa e mes saca su som, pues indirectamente a bis’e cu e lo bolbe subi. Ta premira cu Oduber lo yega na candidato number #2 pa proximo eleccion. Actualemte, ta Xiomara Maduro tin number #2, pero Dangui a logra mucho mas voto cu Maduro siendo candidato #3. Pues, e posicion #2 di Maduro riba e lista geel, ta na peliger. Dangui ta mucho mas popular cu Maduro como minister y tin mas proyecto cu exito compara cu Maduro. Su aceptacion den comunidad ta mas halto cu di Maduro.
Tocante Dangui Oduber
Danguillaume Pierrino Oduber ta naci na Aruba dia 13 di juli 1978. El a studia “Management Economie en Recht” na Hogeschool in Holland na Rotterdam y a obtene e titulo di Bachelor in Economics.
Na aña 2013 el a drenta politica, a subi lista di Movimento Electoral di Pueblo (MEP) y den su prome salida den eleccion na september 2013 a logra 1749 voto riba su nomber y a bira Parlamentario. Den eleccion na september 2017 el a crece y alcansa 2399 voto individual. Dia 17 di november 2017 el a huramenta como Minister di Turismo, Salubridad Publico y Deporte. Den eleccion na juni 2021, el a baha den voto y a logra 2060 voto, un caida di 14%. Dia 20 di september 2021 el a huramenta como Minister di Salud Publico y Turismo.
Dangui Oduber ta yiu di ex-Minister Presidente Nel Oduber. E ta casa cu Naliza Faarup y ta tata di dos yiu homber.
