Swinda Martha Claire Dumfries ta un di e diesocho personanan cu a ricibi un condecoracion real pa aña 2024 pa loke ta Ridder in de Orde van Oranje Nassau. E sorpresa a bini un siman y mey pasa ora el a haya e carta for di gobernador. E mes no a spera esaki pasobra el a expresa di ta haci su trabao semper cu amor incondicional, anto si bo ta haya reconocemento pa bo esfuerso e ta bunita tambe pa compartie cu bo sernan keri y bo coleganan. Dumfries ta traha como waarnemend hoofd di JGZ cu Departamento di Salud. “Eigenlijk nos tin un meta, pa inverti den nos muchanan. Den e trabao y pafo di trabao tambe.”
Dumfries a bini hunto cu tur amigo, colega y familiarnan durante un lunch na The Old Cunucu House, na mes momento celebrando cumpleaños di su ruman muhe drs. Evelin-Pierre Dumfries. Minister di Salud Dangui Oduber tambe a bini un rato y comparti algun palabra.
“Mi mes ta wak e trabao di Swinda na JGZ, e ta un persona cu ta dedica hopi tempo, energia, e ta haci su trabao cu hopi pasion y amor, y nos ta hopi agradecido pa tin Swinda na JGZ. E ta hopi instrumental den e trabao cu nos ta haci pa mehora e servicio cu nos ta duna na nos comunidad, e ta mas na su luga cu e ta reconoci cu un condecoracion real cu nos tambe ta aplaudi esaki”, segun minister Oduber a expresa.
Desde jong, Dumfries ta ocupa su mes trahando cu e muchanan. Boluntariamente hopi den e parti religioso cu e muchanan den misa, organisa e eventonan y semper inspira nan den e contexto ey. Ora cu el a bay Hulanda, el a sigui haci esaki tambe cu e muchanan eynan anto ora a regresa Aruba el a drenta den hopi funcion boluntario pa varios fundacion, aportando riba e salud y bienestar di e muchanan akinan na Aruba.
Pa mas lesa TREMPAN.COM.
