Lider di AVP, mr. Mike Eman ta babuca door di mira payasada tumando luga riba e tema di energia sostenibel. Henter e desaroyo “green” no a ricibi atencion di e gobierno actual durante henter nan periodo di gobernacion, awo, un aña prome cu eleccion, Minister Glenbert Croes ta biaha bay te Hulanda pa atende conferencia caminda tempo aya, Aruba tabata pionero y hasta tabata ehempel di e topico aki durante gobernacion di AVP.
Lider di AVP, mr. Mike Eman ta di opinion cu Aruba a perde shete aña di desaroyo riba e topico aki. Tur esaki debi na falta di vision di e gobierno actual. Si a sigui cu e vision di AVP, awe Aruba lo casi 100% dependiendo di energia sostenibel, pero asina cu MEP a drenta gobierno, a para tur cos.
E tempo ey expertonan internacional tabata brasa Aruba y tabata pionero y demostra na mundo con atende cu e topico aki. Awo, ta mira un minister, den e caso aki, Minister Glenbert Croes ta bay atende un conferencia pa sinta te patras den sala mientras cu Aruba e tempo ey tabata duna les riba e topico di green.
E ta tristo cu a perde asina hopi aña di desaroyo. A ignor’e y no tin ningun desaroyo nobo. A gasta placa di pueblo pa atende un conferencia sin tin mester. Segun Eman, e ta sinti dolor na su curason door di mira un minister ta haci su mes inutil. E ta mas bien un show, ta mas bien pa hustifica su biahe. Tur esaki ta un payasada di e minister y su gobierno, consisti di MEP y RAIZ.
