Vivienda na Corsou, mescos cu na Aruba ta keda un di e retonan grandi pa pais Corsou. Gwendell Mercerlina, parlamentario pa Partido Nashonal di Pueblo (PNP) a indica cu e problema di vivienda no ta na Aruba of Corsou so, pero e ta un di e retonan mas grandi actualmente den Reino Hulandes.
Hacie atractivo pa e hendenan por cumpra nan propio vivienda, si cuminsa na wak e prijsnan di huur no ta nada barata. Por a tuma nota di un desaroyo unda cu e subsidio riba casnan social, ta algo cu e pais no por sigui carga. Pero si ta bin cu incentivonan, unda cu e comision di Infrastructura di parlamento hunto c’un grupo di FKP (Fundashon Kas Popular) cu tambe tin e fiannsa Popular (Fundashon Fiansa Popular) a bay Bogota y Barranquilla unda cu nan a wak e concepto di hypotheeksubsidie cu ta un di e camindanan cu por yega.
Ta conta e bruto inkomen di esunnan cu ta biba den cas, unda ta subsidia un parti y e otro parti esunnan di e cas lo mester zorg p’e, cu ta yega n’e mesun suma di loke ta paga p’e na huur.
Tambe tin un otro concepto di bouwsubsidie. E dos trayectonan aki ta cosnan cu ta canalisando y ta wak riba termino medio por ta un diferencia di con ta atende cu vivienda na Corsou.
E conceptonan aki tambe ta hay’e na Republica Dominicana, n’e bario Juan Bosch, cu tambe ta haci e sorto di desaroyonan aki di hypotheek-y bouwsubsidie. Na Merca tambe tin home support, pero esun mas exitoso ta esun di Colombia.
Na Corsou, ainda tin Wechi cu ta den desaroyo di cas mescos cu Noord Zapateer unda cu ta purba di combina no solamente un solo grupo di enfoke, cu ta biba den e areanan aki.
Si mira e desaroyo di Scharloo y Fleur de Marie, unda cu e enfoke ta riba e ‘young professionals’, e desaroyo di Elisa Academy, es decir cu tin un movecion grandi di vivienda den e parti aki di Punda, cu ta hacie hopi interesante pero tambe atractivo.
Pero cu ainda tin problema di vivienda, vooral e casnan social, esey ta e caso.
